November 2023

Garoowe, November 26, 2023: Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibriil oo ay wehliyaan Guddoomiye ku-xigeenka 1-aad Golaha Wakiillada Mudane Cabdicasiis Cabdullahi Cismaan iyo Guddoomiye ku-xigeenka 2-aad Mudane Ismaaciil Maxamed Warsame ayaa maanta shir-guddoomiyey fadhiga 11-aad ee Kal-fadhiga 53-aad Golaha Wakiillada Dawladda Puntland. Fadhiga maanta ayaa waxaa soo xaadiray 48 mudane, waxaana looga hadlay arrimaha Siyaasadda Puntland, Amniga iyo sidii xildhibannada Golaha Wakiilladu door muhiim ah uga qaadan la haayeen ilaalinta midnimada & wadajirka Puntland si nabad iyo xasilooni ay ku jirto. Sida qorshaha ahaa fadhiga maanta ayaa lagu wadday in looga doodo wax-ka-bedelka Xeerka doorashooyinka Puntland, hasse yeeshee Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibril ayaa Xildhibaannada la wadaagay in wax-ka-bedelka xeerka la gelinayo la tashi guud. Fadhiga oo qaatay wakhti dheer ayaa la isla qaatay in Xildhibaannada dib loogu soo wargeliyo fadhiga dambe si loo dhammeystiro shaqooyinka Golaha horyaal maalmaha soo socda haddii EEBBE idmo. DHAMMAAD Xafiiska Warfaafinta & Wacyi-gelinta Golaha Wakiilada Dawladda Puntland E-mail: info@puntlandparliament.com Facebook: https://facebook.com/Parliamentofpl

Fadhiga 10-aad, Kal-fadhiga 53-aad Fadhiga maanta oo qorshuhu ahaa wax-ka-bedelka Xeerka Doorashooyinka Puntland, kaas oo 14kii Bisha November, 2023 Guddoonka Golaha u xil saaray guddi gaar ah. Guddiga loo xil-saaray xeerka ayaa Golaha u soo gudbiyay qoraal ku saabsan wax-ka-bedelka xeerka Doorashooyinka Puntland oo guddigu gacanta ku hayay, kaas oo maanta qorshuhu ahaa in goluhu ka doodo si waafaqsan Qodobka 70-aad ee Dastuurka Dawladda Puntland iyo Qodobka 58-aad ee xeer-hoosaadka Golaha Wakiillada. Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibriil ayaa golaha la wadaagay in La tashi guud kadib, maalinta Axad ah ( 26-Nov, 2023) Golaha dib loogu soo celin doono Xeerka Doorashooyinka Puntland. – DHAMMAAD

Garoowe, November 14, 2023: Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibriil oo ay wehliyaan Guddoomiye ku-xigeenka 1-aad Golaha Wakiillada Mudane Cabdicasiis Cabdullahi Cismaan iyo Guddoomiye ku-xigeenka 2-aad Mudane Ismaaciil Maxamed Warsame ayaa maanta shir-guddoomiyey fadhiga 9-aad ee Kal-fadhiga 53-aad Golaha Wakiillada Dawladda Puntland. Fadhiga maanta Ajandihiisa oo ahaa ka doodista Xeerka Cashuuraha Berriga oo Goluhu maalintii 2-aad akhriska 3-aad ku samaynayo, si waafaqsan Dastuurka Dawladda Puntland Qodobkiisa 64-aad farqadiisa 1-aad iyo Qodobka 3-aad farqadiisa 1-aad ee iyo Xeer-hoosaadka Golaha Wakiillada Puntland, iyadoo Guddiga Maaliyadda, Dhaqaalaha iyo Xisbaadka Golaha Wakiillada uu gacanta ku hayey xeerka ayna kulamo latashi kala yeesheen hay’adaha uu khuseeyo Xeerku. Dood iyo falanqeyn dheer kadib xildhibannada Golaha Wakiillada ayaa cod gacan taag ah ku ansixiyey Xeerka Cashuuraha Berriga oo muhiimad gaar ah u leh qaabka dakhli kobcinta, uruurinta cashuuraha iyo dhakhliga Dawladda Puntland, si dawladda u bixiso adeegayada ay shacabka u hayso. Guntanka fadhiga oo ahaa (37) Mudane, waxaa ugu codeeyey oggol (30) Mudane, diidmo (2) Mudane, halka ay ka aamuseen (5) Mudane. Ugu dambeyntii, waxaa xildhibaannada Golaha Wakiillada loo qeybiyey Wax-ka-bedelka Xeerka Doorashooyinka Puntland oo Golaha Xukuumamdu soo gudbisey, waxaana lagu wareejiyey Guddiga gaar ah oo guddoonka Golahu u-xil-saaray ka shaqeynta Xeerarka Doorashooyinka ee Golaha horyaal, waxayna Guddigu warbixinta wax-ka-bedelka Doorashooyinka golaha dib ugu soo celin doonaan Maalinta Isniinta oo tariikhdu ku beegan tahay 20 November ,2023 haddii Alle idmo. Dhammaad.

Garoowe, November 13, 2022: Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibriil oo ay wehliyaan Guddoomiye ku-xigeenka 1-aad Golaha Wakiillada Mudane Cabdicasiis Cabdullahi Cusmaan iyo Guddoomiye ku-xigeenka 2-aad Mudane Ismaaciil Maxamed Warsame ayaa maanta shir-guddoomiyey fadhiga 8-aad ee Kal-fadhiga 53-aad ee Golaha Wakiillada. Guddiga Maaliyadda, Dhaqaalaha iyo Xisaabaadka Golaha Wakiillada oo gacanta ku hayey akhriska 2-aad ku sameeyey Xeeraka Dakhliga Cashuuraha Berriga Puntland ayaa Golahu warbixinta ka dhegeystay, tasoo la la xiriirtey latashiyo uu la yeeshay dhammaan Hay’adaha uu khuseeyo Xeerka iyo wax-ka-bedelka Godobo kamid ah Xeerka. Intaas kadib, Golahu wuxuu guda galay ka doodista Xeerka qodob-qodob, si waafaqsan Dastuurka Dawladda Puntland. Xeerka dhakhliga Cashuuraha Berriga Puntland ayaa ujeeddadiisu tahay in la tayeeyo qaabka dhakhli uruurinta iyo cashuuraha Berriga Puntland iyo in muwaadiniintu ay bixiyaan cashuuraha ku waajibey ee waafaqan Xeerarka Cashuuraha Puntland, si dawladdu u fuliso adeegyada kala duwan ee loo qabto shacabka. Dooddda wax-ka-bedelka Xeerka Dakhliga Cashuuraha Berriga Puntland ayaa socon-doonta ilaaa maalinta berri oo ku beegan 14 November, 2023 si waafaqsan Qodobka 58-aad ee Xeerka hoosaadka Golaha Wakiillada. DHAMMAAD

Garoowe, November 12, 2023: Guddiga maaliyadda, dhaqaalaha & xisaabaadka ayaa maanta kulan la yeeshay mas’uuliyiinta Wasaaradda Maaliyadda DPL. Guddiga oo gacanta ku haya, akhriska 2-aad-na ku samaynaya hindise-xeereedka dakhliga cashuuraha berriga, kana duulaya qodobka 58-aad farqadiisa 5-aad ee xeer-¬hoosaadka Golaha Wakiillada waxay Wasaaradda Maaliyadda oo Xeerka soo gudbisay, ka dhageysteen aragtidooda ku aadan muhiimadda xeerkan uu u yeelanayo Dawladda Puntland, iyagoo dhanka kalena su’aalo ka weydiiyey. DHAMMAAD.

Garoowe, November 08, 2023: Guddiga Maaliyadda, Dhaqaalaha iyo Xisaabaadka Golaha Wakiillada Dawladda Puntland ayaa maanta Kulan wada tashi ah Xarunta Golaha Wakiillada kula yeeshay qaar ka mid ah Wasaaraha iyo hay’adaha Dawladda. Ujeeddada kulanka ayaa ahayd la tashiga Wasaaraddaha iyo hay’adaha Dawladda ee uu khuseeyo Hindise-Xeereedka Dakhliga Cashuuraha Berriga Puntland oo Guddigu gacanta ku hayo, isla markaana ku sameynayey akhriska labaad si waafaqsan Dastuurka iyo Xeerhoosaadka Golaha Wakiillada. Ugu horeyn, Guddiga ayaa mas’uuliyiinta kulanka ka soo qeybgalay la wadaagay nuqulka Hindise-Xeereedka iyo warbixinta guud oo la xiriirta geedi socodka hanaanka Xeer-dejinta gaar ahaan hawlaha laga qabtay Hindise-Xeereedkan. Sidoo kale, waxay Guddigu mas’uuliyiinta wasaaradaha iyo hay’adaha wax ka weydiiyeen baahidda keentay wax ka bedelka Hindise-Xeereedkan iyo tabashooyinka Bulsho ee la xiriira cashuuraha. Mas’uuliyiinta ka socotay Wasaaradaha iyo hay’adaha dawladda ee kulan ka soo qeybgashay ayaa Guddiga warbixinta ka siiyey xaaladda Cashuuraha Berriga Puntand, sidoo kale, waxay Guddiga la wadaageen talooyin la xiriira Hindise-Xeereedka Guddiga horyaala. Ugu dambeyntii, Guddiga Maaliyadda, Dhaqaalaha iyo Xisaabaadka ayaa sii wadi doona falan-qeynta, iyo isku-dabaridka Hindise-Xeereedka Dakhliga Cashuuraha Beriga Puntland iyadoo la filayo in ay horgeeyaan Golle weynaha Maalinta Sabtida oo tariikhdu ku beegan tahay 11 November ,2023 si Golle weynuhu ugu sameeyo akhriska seddexaad, haddii Alle idmo. DHAMMAAD.

Garoowe, Nofeembar 05, 2023: Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibriil oo ay wehliyaan Guddoomiye ku-xigeenka 1-aad Golaha Wakiillada Mudane Cabdicasiis Cabdullahi Cusmaan iyo Guddoomiye ku-xigeenka 2-aad Mudane Ismaaciil Maxamed Warsame ayaa maanta shir-guddoomiyey fadhiga 7-aad ee Kal-fadhiga 53-aad Golaha Wakiillada Dawladda Puntland. Ugu horeyn, waxaa xubnaha Golaha Wakiillada loo qeybiyey warbixinta Miisaaniyadda sannadka 2024, si waafaqsan qodobka 136-aad ee Dastuurka Dawladda Puntland, waxaana la marin doonaa habraaca sharci ee ku cad Dastuurka iyo Xeerhoosaadka Golaha Wakiillada Dawladda Puntland. Miisaaniyada Dawladda ee Sannadka 2024-ka ayaa dhan $387,550,700, ( Saddex boqol sideetan iyo todoba malyan , shan boqol iyo konton kun iyo todobo boqol oo dollar) kororka Miisaaniyadda ayaa ah 3% (Boqolkiib seddex) marka la bar-bar dhigo miisaaniyadii sannadkii hore. Wasiirka Wasaaradda Maaliyadda Dawladda Puntland Mudane, Maxamed Cabdiraxmaan Dhabancad ayaa khudbad uu ka jeediyey Golaha Wakiillada waxa uu ku faah-faahiye Miisaaniyadda Dawladda Sannadka 2024-ka, taas oo bilaabneysa dhaqan-galkeeda January 1, 2024-ka kuna eg December 31, 2024 si waafaqsan Qodobka 135-aad farqadiisa 4-aad ee Dastuurka Dawladda Puntland. Ugu dambeyntii, waxaa xildhibaannada Golaha Wakiillada loo qeybiyey Hindise Xeereedka Cashuuraha Beriga oo ay xukuumaddu usoo gudbisey Golaha Wakiillada, waxaana lagu wareejiyey Guddiga Maaliyadda, Dhaqaalaha iyo Xisaabaadka ee Golaha Wakiillada DPL ah si ay akhrinta labaad ugu soo sameeyaan Golahana ugu soo gudbiyaan wax-ka-bedelka ay ku sameeyaan Hindise Xeereedka Cashuuraha Beriga , waxayna Guddigu warbixinta wax-ka-bedelka Hindise Xeereedka golaha dib ugu soo celin doonaan Maalinta Sabtida oo tariikhdu ku beegan tahay 11 November ,2023 haddii Alle idmo. DHAMMAAD Xafiiska Warfaafinta & Wacyi-gelinta Golaha Wakiillada Dawladda Puntland

Garoowe: November 04, 2023: Guddoomiyaha Golaha Wakiillada Dawladda Puntland Mudane, Cabdirashid Yusuf Jibril Cawl oo uu weliyey Guddoomiye ku xigeenka 2-aad Mudane, Ismaaciil Maxamed Warsame, ayaa maanta Shir-guddoomiyey fadhiga 6-aad ee Kalfadhiga 53-aad Golaha Wakiillada Dawladda Puntland. Fadhiga maanta Ajandaha ayaa ahaa dhegeysiga warbixinta Guddiga Arrimaha Deegaanka iyo Khayraadka Dabiciiga ah ee Golaha Wakiillada DPL oo akhrinta labaad ku soo sameeyey wax-ka-bedelka Xeerka Sahminta Saameynta Deegaanka iyo Bulshada Puntland, si waafaqan Dastuurka Dawladad Puntlad Qodobkiisa 64-aad iyo Xeer-hoosaadka Golaha Wakiillada DPL. Intaas kadib waxaa qodob qodob loo asnixiyey Wax-ka-bedelke Xeerka si waafaqsan Qodobka 70-aad ee Dastuurka Dawladda Puntland Ugu dambeyntii, dood iyo fanqeyn dheer kadib xildhibaannada Golaha Wakiillada ayaa cod gacan-taag ah ku ansixiyey wax-ka-bedelka Xeerka Sahminta Saameynta Deegaanka iyo Bulshada Puntland kasoo muhiim gaar ah u leh ilaalinta Deegaanka. Guntanka Fadhiga oo ahaa (38) Mudane, waxaa ugu codeeyey aggol (37) Mudane, diidmo majirin halka uu ka aamusey (1) Mudane. Dhammaad Xafiiska Warfaafinta & Wacyi-gelinta Golaha Wakiillada Dawladad Puntland

Garoowe, November 01, 2023: Guddoomiye ku-xigeenka 1-aad ee Golaha Wakiillada DPL Mudane, Cabdicasiis Cabdilaahi Cismaan ayaa maanta xafiiskiisa ku qaabilay wefti uu hogaaminayo Mr Dragan Popivic mas’uulka ugu sareeya barnamaijka siyaasadda loo dhahanyahay ee (UNDP Inclusive politics portfolio manager). Guddoomiye ku-xigeenka iyo weftiga UNDP ayaana ka wada hadlay xoojinta wada shaqeynta UNDP iyo Golaha Wakiilladda DPL iyo sidii hay’adda UNDP taageero buuxda uga geysan lahayd qorshaha horumarinta Golaha Wakiillada DPL. Kulanka ayaa waxaa goob-joog ka ahaa Xoghayaha guud ee Golaha Wakiilladda iyo Madaxa Xafiiska UNDP ee Garoowe iyo saarkii kale oo tirsan Golaha Wakiillada iyo Hay’adda UNDP. DHAMMAAD

Garoowe, November 01, 2023: Guddiga Arrimaha Deegaanka & kheyraadka dabiiciga ah ayaa maanta Aqalka Wakiillada kulan kula yeeshay mas’uuliyiinta Wasaaradda Deegaanka & Isbadelka cimilada Puntland. Guddiga oo gacanta ku haya, akhriska 2-aad-na ku samaynaya wax-ka-badelka Xeerka Sahminta Saameynta Deegaanka iyo Bulshada, kana duulaya qodobka 58-aad farqadiisa 5-aad ee xeer-hoosaadka Golaha Wakiillada waxay Wasaaradda Deegaanka oo Xeerka soo gudbisay, ka dhageysteen aragtidooda ku aadan muhiimadda xeerkan iyo qodobada wax-ka badelka lagu sameeyey. DHAMMAAD