March 2026

Garowe, 5 Mar 2026- Guddoomiye Ku-xigeenka 2-aad ee Golaha Wakiillada Dowladda Puntland Hon Mohamed Mahamud Esse iyo qaar ka mid ah Mudanayaasha Golaha ayaa maanta soo dhoweeyey Xildhibaannada Puntland ku metela labada Aqal ee Baarlamaanka Federaalka Soomaaliya. Munaasabadda waxaa sidoo kale ka soo qayb galay Madaxweynihii hore ee Dowladda Puntland, ahna Senator ka tirsan Aqalka Sare ee Baarlamaanka Federaalka Soomaaliya, Wasiirro, masuuliyiin kala duwan iyo qaybaha kala geddisan ee bulshada Puntland. Kulankan soo dhoweynta ah ayaa muujinayey midnimoiyo is garab istaag wakiillada shacabka Puntland ku metela labada Aqal ee Baarlamaanka Federaalka Soomaaliya. DHAMMAAD

Balidhidin, 4 Mar 2026: Xildhibaan Faarax Jaamac Yuusuf oo ka mid ah Golaha Wakiilada Dowlada Puntland ayaa ka qayb galay kulan ku saabsan dhismaha iyo sharciyeynta Guddi Xallinta Khilaafaadka Bulshada (CDRC) ee tuulada Tuurmasaale, Degmada Balidhidin. Kulanka ayaa waxaa ku weheliyey Wasiir Doowlaha Wasaaradda Arrimaha Gudaha, Federaalka iyo Dimuqraadiyeynta ee Puntland, waxaana ka soo qayb galay odayaasha dhaqanka, haweenka, dhalinyarada iyo qaybaha kala duwan ee bulshada. Ujeeddada kulanka ayaa ahayd in la xaqiijiyo baahida loo qabo guddigan, isla markaana la hubiyo in xubnaha la soo xulayo ay noqdaan kuwo leh metelaad dhab ah, karti iyo kalsooni bulsho, si ay door wax ku ool ah uga qaataan xallinta khilaafaadka iyo adkaynta nabadda deegaanka. DHAMMAAD

Garoowe, March 02, 2026: Guddoomiyaha Golaha Wakiillada Dawladda Puntland Hon Abdirisak Ahmed Said, oo uu weheliyo Guddoomiye ku-xigeenka Hon Mohamed Mahamud Esse, ayaa shir-guddoomiyey fadhiga 7-aad ee Guddiga Joogtada ah. Fadhiga maanta waxaa looga hadlay xaaladda guud ee Puntland, waxaana warbixinno looga dhegeystey madax guddiyeedyada Golaha, taasoo la xiriirtey Xaaladda Guud ee Puntland, Amniga, siyaasadda, abaaraha ka jirta deegaanka Puntland. Intaas kadib, Guddiga Joogtada ah waxay kulanka uga hadleen xaaladda Guud ee dalka iyagoo si adag u cambaareeyey xadgudubka lagula kacay xildhibaannada Baarlamaanka Federaalka Soomaaliya ku metela Puntland iyo shacabka la socday diyaaradda, kuwaas oo 01/03/2026 hawada laga celiyey, iyadoo khatar la geliyey naftooda. Arrintaasoo ka soo horjeedda Dastuurka Ku-meel-gaarka ah ee lagu heshiiyey ee dalka. Sidoo kale, Guddiga Joogtada ah waxay ka soo horjeesteen falalka caburinta iyo khatar-gelinta sharci-darrada ah ee ay Dowladda Federaalka Soomaaliya ku samaysay, kuna xanibtay isu-socodka shacabka iyo joojinta duulimaadyada, iyadoo si khaldan looga faa’iideystay awoodda iyo mas’uuliyadda saaran Dowladda Federaalka. Ugu dambayntii, Guddiga Joogtada ah ee Golaha Wakiilladu waxay ummadda Soomaaliyeed ugu baaqayaan inay ilaashadaan midnimadooda iyo wadajirkooda, isla markaana meel looga soo wada jeesto wax kasta oo wax u dhimaya midnimada iyo wada noolaanshahooda, si looga bedbaado khatar kasta oo dalka ku timaadda. DHAMMAAD