Booqasho D. Doorasho

Garoowe: 18,October, 2022: Guddiyo ka tirsan Golaha Wakiillada Dawladda Puntland oo maanta Aqalka Wakiillada Kulan kula yeeshay Taliyaha Hoggaanka Dembi-baarista (CID). Guddiyadda oo kala ah Guddiga Shuruucda, Caddaaladda Arrimaha Diinta & Dastuurka iyo Guddiga Xaquuqul Insaanka, Haweenka & Arrimaha Qoyska Golaha Wakiillada DPL ayaa Taliyaha Hoggaanka (CID), Ku-xigeenkiisa iyo Saraakiisha kale ka dhageystay warbixin ku saabsan waxyaabaha u qaboomay iyo caqabadaha jira, waxayna intaas kadib su’aalo ka weydiiyeen arrimahooda shaqo. Guddiyada ayaa sidoo kale, Hoggaanka Dembi-baarista wax ka weydiiyey waxyaabo uga soo baxay kormeerkii wada-jirka ahaa ee labada Guddi dhowaan ku mareen qaar kamid ah Gobolada & dhacdooyin ka dhacay qaar kamid ah deegaannada PL oo horyaalla xafiisyada Baarista & Bahda Garsoorka, una baahan Caddaalad. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland#Puntland #Somalia

Garoowe: 15,October, 2022: Guddiga Shuruucda, Caddaaladda, Arrimaha Diinta & Dastuurka Golaha Wakiillada DPL ayaa maanta kormeer ku tagay Wasaaradda Caddaaladda, Arrimaha Diinta, Dhaqancelinta & Dastuurka DPL. Guddiga ayaa ugu horeyn la kulmay Wasiirka Wasaaradda, Wasiiru-dawlaha & Agaasimaha Guud, Waxayna Mudaneyaashu mas’uuliyiintan ka dhagaysteen warbixin ballaaran oo ku saabsan waxqabadka Wasaaradda, Qorsheyaasha iyo Caqabadaha jira. Ugu dambeyntii Xildhibaanada ayaa booqday xafiisyada kala duwan ee Wasaaradda, iyagoo u kuurgalay hab shaqadu u socoto iyo qorsheyaasha degsan. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland

Bursaalax: 14,October, 2022: Guddiyo ka tirsan Golaha Wakiillada DPL oo maanta Booqday Degmooyinka Galdogob iyo Bursaalax ee Gobolka Mudug. Guddiga Maaliyadda, Dhaqaalaha & Xisaabaadka, Guddiga Amniga & Nabadgalyada iyo Guddiga Howlaha Guud, Gaadiidka, Ganacsiga & Kaabayaasha Dhaqaalaha, ayaa ugu horeyn booqday mashruuca Wadada isku xira Magaalooyinka Gaalkacyo iyo Bursaalax oo dhisme uu ku socdo, ayna iskaashanaayan Dadka Deegaanka & Dawladda Puntland. Guddiyada ayaa warbixin ka dhageystay Guddoomiyaha Degmada iyo Engneerada gacanta ku haya mashruucan oo wax ka badan ka tari doona isku socodka Degmada Bursaalax iyo guud ahaan Gobolka Mudug. Sidoo kale Guddiyada ayaa kormeeray Xarunta Caafimaadka ee Galdogob, iyagoo Maamulka xarunta ka dhageystay habka shaqadu u socota, Taageerada ay Wasaaradda Caafimaadka ka helaan iyo baahiyaha jira. Guddiyadu ayaa u ballan-qaaday Shacabka & Maamulka Degmada in warbixintooda ay u geyn doonaan Hay’addaha ay khuseyso, si looga jawaabo baahiyahooda ayna ka jeedin doonaan Kalfadhiga soo socda ee Baarlamanka. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland

Goldogob: 13,October, 2022: Guddiyo ka tirsan Golaha Wakiillada DPL oo maanta u kuurgalay Xaalada guud ee Degmada Goldogob iyo Bar Xuduudeedka Tuur-dibi. Guddiga Maaliyadda, Dhaqaalaha & Xisaabaadka, Guddiga Amniga & Nabadgalyada iyo Guddiga Howlaha Guud, Gaadiidka, Ganacsiga & Kaabayaasha Dhaqaalaha, ayaa ugu horeyn waxay kormeer ku sameeyen Xarunta Degmada Goldogob, Saldhiga Booliska, Garoonka Diyaaradaha iyo Cisbitaalka Magaalada, iyagoo warbixin ka dhageystay mas’uuliyiinta kala duwan habka shaqadu u socoto, Amniga, Horumarka, Caqabadaha iyo Baahiyaha jira. Waxaana Guddiyadu ay ballan-qaadeen in warbixinta guud ee Degmada ay u geyn doonaan Hay’addaha ay khuseyso, ayna ka jeedin doonaan Kalfadhiga soo socda ee Baarlamanka. Sidoo kale, Guddiyada ayaa booqday bar Xuduudeedka Tuur-dibi, iyagoo Saraakiisha Laanta Socdaalka iyo kuwa Kastamka ka dhageystay habka shaqada u socoto, kulana dardaarmay in Bulshada loogu adeego si hufnaan leh. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland.

Badhan: 12,October, 2022: Guddiga Arrimaha Deegaanka & khayraadka Dabiiciga ah, Guddiga Siyaasadda, Qorshaynta & Xiriirka Caalamiga ah iyo Guddiga Arrimaha Golaha oo safar shaqo ku tagay Degmada Badhan ee Xarunta Gobolka Sanaag ayaa Kulan la qaatay Maamulka Gobolka, kan Degmada Badhan, Xubno kamid ah Golaha Deegaanka, isuduwayaasha Wasaaradaha, Taliyayaasha Ciidanka iyo Mas’uuliyiin kale. Guddigu waxa ay ka dhegaysteen Mas’uuliyiinta kala duwan warbixin ku saabsan Xaaladda Guud ee Gobolka sida Amniga, Abaarta, Shaqooyinka socda iyo Caqabadaha. Sidoo Kale Guddiga iyo Maamulka Gobolku waxa ay si wada jira ah u kormeereen Xarumaha Dawladda ee kala ah Gobolka, Degmada, Saldhiga Booliska iyo Xarumaha kale ee Adeega Bulshada, iyagoo ka xog wareystay Saraakiisha Xarumahaasi Shaqooyinka socda & waxyaabaha qabsoomay. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland.

Boosaaso: 11,October,2022: Guddiga Arrimaha Deegaanka & khayraadka Dabiiciga ah, Guddiga Siyaasadda, Qorshaynta Iyo Xiriirka Caalamiga ah iyo Guddiga Arrimaha Golaha oo maalmahan safar shaqo ku Joogay Xarunta Gobolka Bari ee Boosaaso ayaa Kulan la qaatay Agaasimaha Maxjarrada Puntland oo ay weheliyaan qaar kamid ah dhakhaatiirta ka howlgala Maxjarrada iyo Xubno kale. Kulanka ayaa Guddigu waxay uga dhegaysteen Agaasimaha Maxjarrada, Dhakhaatiirta iyo Masuuliyiinta kaleba Warbixin la xiriirta Xaaladda Guud ee Maxjarrada, Dhoofka Xoolaha iyo caqabadaha jira. Sidoo kale Guddigu waxa ay Kormeer ku tageen Maxjarka Al-Waddani iyagoo u kuur galay habsami usocodka shaqada Maxjarka iyo xaaladda Xoolaha kala duwan ee ku jira. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland.