Guddiyada

Garoowe, January 15, 2026: Guddoomiyaha Golaha Wakiillada Dawladda Puntland Hon Abdirisak Ahmed Said, oo uu weheliyo Guddoomiye ku-xigeenka 2-aad Hon Mohamed Mahamud Esse, ayaa shir-guddoomiyey fadhiga 1-aad ee Guddiga Joogtada ah. Fadhiga maanta oo ka qabsoomay hoolka shirarka Guddiga Joogtada ah ee Golaha Wakiillada Dowladda Puntland, ayaa Guddoomiyaha Golaha Wakiilladu warbixin guud ka siiyey guddiga xaaladda dalka, gaar ahaan arrimaha ka soo cusboonaaday gobolka, iyo doorka Puntland ku leedahay. Intaas kaddib, Guddiga Joogtada ah ayaa dood dheer ka yeeshay xaaladda siyaasadeed ee dalka iyo tan gobolkaba. Sidoo kale, Guddigu wuxuu warbixin ka dhegeystay Madax-gudiyeedyada Golaha, taasoo la xiriirtay xaaladda guud ee dalka, Amniga, siyaasadda, abaaraha ka jira deegaannada Puntland, iyo doorka Golaha Wakiillada ee la socodka iyo u qareemidda dadka iyo duunyada ay abaartu saamaysay. Waxaa kale oo looga hadlay kulanka cabashooyinka ay Golaha u soo gudbiyeen Nootaayooyinka Dadweynaha ee ka hawlgala caasimadda Puntland. Guddiga Joogtada ah ee Golaha Wakiillada Dowladda Puntland, oo wakiil ka ah Goleweynaha iyo shacabka Puntland, wuxuu hoosta ka xariiqayaa in xuduudaha Puntland ee ku cad Qodobka 7-aad ee Dastuurka Dowladda Puntland ay yihiin lama taabtaan, lagumana xadgubi karo, lamana kala qaybin karo, isla markaana aan faragelin gudaha ah iyo mid dibadeed toona lagu samayn karin. Guddigu wuxuu qirayaa in Dowladda Puntland ay mar walba u taagnayd dhisidda iyo ilaalinta midnimada iyo wadajirka Ummadda Soomaaliyeed una tagnaan doonto ,hase yeeshee, Guddigu wuxuu caddeynayaa in Dowladda Federaalka ee loo idmaday ilaalinta midnimada ummadda, ay gabtay kaalinteedii ku aaddanayd adkaynta midnimada iyo wadajirka ummadda Soomaaliyeed, waxyaabaha dhacayana ay iyadu mas’uul ka tahay, kaddib markii ay ku mashquushay kala qaybinta, isku dirka, cunaqabataynta iyo cadaadinta lagu hayo dadka Soomaaliyeed. Guddiga Joogtada ah ee Golaha Wakiillada, isagoo ka duulaya danaha uu u dhaartay ee dadka reer Puntland, isla markaana tix-gelinaya xiriirka ganacsi ee soo jireenka ah ee ka dhexeeya shacabka Puntland iyo Dowladda Isutagga Imaaraadka Carabta, iyo taageerada mugga leh ee ay Imaaraadku siiyeen Puntland gaar ahaan dhinacyada Amniga, horumarka, iyo la dagaallanka Daacish iyo Al-Shabaab, wuxuu Guddigu si buuxda u taageerayaa war-saxaafadeedkii Xukuumadda Puntland ee soo baxay 12/01/2026. Sidoo kale, Guddigu wuxuu uga mahadcelinayaa Dowladda Imaaraadka Carabta taageerada joogtada ah ee ay siiso dadka Soomaaliyeed, gaar ahaan shacabka Puntland. Iyadoo laga duulayo cabashooyinka ay soo gudbiyeen Nootaayooyinka Dadweynaha, Guddiga Joogtada ahi wuxuu u xilsaaray Guddiga Caddaaladda, Arrimaha Diinta iyo Dastuurka, iyo Guddiga Maaliyadda, Dhaqaalaha iyo Xisaabaadka si ay baaritaan iyo talo-bixin uga soo diyaariyaan. Sidoo kale, iyadoo la eegayo xaaladda abaaraha, Guddiga Joogtada ah wuxuu u xilsaaray qaar ka mid ah guddiyada inay keenaan warbixin dhammaystiran oo ku saabsan xaaladda abaaraha iyo jawaabaha ay bixiyeen hay’adaha dowladda. Arrintan waxaa si gaar ah loogu xilsaaray Guddiga Arrimaha Gudaha, Federaalka iyo Dimuqraadiyadda, iyo Guddiga Arrimaha Deegaanka iyo Khayraadka Dabiiciga ah. Dhinaca kale, Guddiga Joogtada ah wuxuu isla qaatay in la dardar-geliyo qorshayaasha mudnaanta u leh Guddiyada Golaha Wakiillada, lana xoojiyo dabagalka iyo fulinta xeerarkii Goluhu ansixiyey Kalfadhigii 57-aad ee Golaha Wakiillada. Ugu dambayntii, Guddiga Joogtada ah wuxuu shacabka Puntland ugu baaqayaa inay ilaashadaan midnimadooda iyo wadajirkooda, isla markaana ay si midaysan uga hortagaan cid kasta oo lid ku ah jiritaankooda. Sidoo kale, wuxuu hay’adaha amniga farayaa inay adkeeyaan sugidda Amniga gudaha iyo ilaalinta xuduudaha Puntland. DHAMMAAD

Boosaaso, 27 May 2025 —Qaybta 1-aad Sawirad: Kulanka Golaha Wakiiladda Dawladda iyo Dadweynaha Degmada Boosaaso. Guddiga Golaha Wakiillada Dawladda Puntland ee kormeerka shaqo ku jooga Gobolka Bari ayaa caawa kulan muhiim ah la yeeshay bulshada rayidka ah ee gobolka. Kulankan oo ka dhacay magaalada Boosasso waxaa ka qaybgalay Guddoomiye Kuxigeenka Gobolka Bari, Gudoomiye ku xigeenka degmada Boosasso, xubno ka tirsan Golaha Deegaanka, iyo qaybaha kala duwan ee bulshada. Intii uu socday kulanka, bulshada rayidka ah waxay fursad u heleen in ay su’aalo toos ah weydiiyaan xildhibaannada, kuwaas oo si hufan uga jawaabay su’aalihii iyo tabashooyinkii lasoo jeediyay. Dhinaca kale, waxaa laga soo jeediyey waxqabadka Golaha Wakillada ee ku aaddan Xeer-dejinta, Korjoogteynta Hay’adaha dawlaha iyo Matelaadda Kulamada wuxuu qeyb ka yahay dadaallada Golaha Wakiillada Puntland ee lagu xoojinayo isla-xisaabtanka, is-dhexgalka shacabka iyo wakiilladooda, iyo weliba in la helo aragtiyo iyo talooyin toos ah oo ka imaanaya shacabka – kuwaas oo wax ka tari kara hawlaha sharci-dejinta iyo waajibaadka kale ee Golaha. DHAMMAAD .

Gaalkacyo, 26 May 2025 -Guddiga Golaha Wakiilada Dowlada Puntland ee safarka Shaqo ku jooga Gobolka Mudug, ayaa maanta kulan la qaatay Guddiga Amniga Gobolka Mudug. Shirka ayaa warbixin looga dhageystay Guddiga Nabadgelyada Gobolka, taasoo la xiriirta xaalada Amniga Gobolka Mudug gaar ahaan Magaalada Gaalkacyo, iyadoo Xildhibaannadu ay su’aalo ay ka weydiiyeen Mas’uuliyiinta arrimaha ay ka hadleen. Shirka ayaa waxaa Xildhibaannada kala ka qayb galay Guddoomiyaha Gobolka Mudug, ku-xigeenkiisa, Guddoomiyaha Maxakmadda Racfaanka, ku-simaha Duqa Gaalkacyo, Taliyaha Xabsiga dhexe iyo Taliyaha Nabad Sugidda iyo Sirdoonka Gobolka Mudug. DHAMMAAD

Gaalkacyo, 24 May 2025 — Guddiga Golaha Wakiillada Dowladda Puntland ee kormeerka shaqo ku jooga Gobolka Mudug ayaa caawa kulan muhiim ah la yeeshay bulshada rayidka ah ee gobolka. Kulankan oo ka dhacay magaalada Gaalkacyo waxaa ka qaybgalay Guddoomiyaha Gobolka Mudug, maamulka degmada, xubno ka tirsan Golaha Deegaanka, iyo qaybaha kala duwan ee bulshada. Intii uu socday kulanka, bulshada rayidka ah waxay fursad u heleen in ay su’aalo toos ah weydiiyaan xildhibaannada, kuwaas oo si hufan uga jawaabay su’aalihii iyo tabashooyinkii lasoo jeediyay. Kulankan wuxuu qeyb ka yahay dadaallada Golaha Wakiillada Puntland ee lagu xoojinayo isla-xisaabtanka, is-dhexgalka shacabka iyo wakiilladooda, iyo weliba in la helo aragtiyo iyo talooyin toos ah oo ka imaanaya shacabka – kuwaas oo wax ka tari kara hawlaha sharci-dejinta iyo waajibaadka kale ee Golaha. DHAMMAAD –

Badhan, 24-ka Maajo 2025 — Guddiga Golaha Wakiillada Dowladda Puntland ee safar shaqo ku tagay Gobolka Sanaag, gaar ahaan Degmada Badhan, ayaa ka qaybgalay furitaanka Imtixaanka Shaadiga ah ee Fasalada 8-aad iyo 12-aad ee Dawladda Puntland. Xildh Axmed Bille Siciid Guddoomiye ku xigeenka Guddiga Arrimaha Bulshada Golaha Wakiillada DPL ayaa maanta daah furay imtixaanka shahaadiga ah ee degmada Badhan, guud ahaan Puntland Ayuu ka socdaa Imtixaanku,waxaana ugu dambayn loo rajeeyey arydaydu in ay guulaystaan si habsami lehna ugu soo dhammaado. Dhinaca kale, guddigii safarka ugu baxay Degmada Badhan ayaa booqasho ku tagey Jaamacadda Ummadda Soomalaiyeed faraca Degmada Badhan Puntland, iyadoo halkaas uu kusoo dhoweeyey Guddoomiyaha Jaamacadda isagoo uga warbixiyey xaalada guud ee Jaamacadda. *DHAMMAAD*

Garoowe, 14-ka Maajo 2025 — Guddiga Hawlaha Guud, Gaadiidka, Ganacsiga iyo Kaabayaasha Dhaqaalaha ee Golaha Wakiillada Dowladda Puntland ayaa maanta kulan muhiim ah la yeeshay mas’uuliyiinta Wasaaradda Ganacsiga, Warshadaha iyo Maalgashiga Puntland. Kulankan ayaa diiradda lagu saaray , wax-ka-beddelka Xeerka Tayodhawrka Badeecadaha Puntland, iyadoo Guddigu uu ka duulayo waajibaadyada shaqo ee uu u xilsaaran yahay. Intii uu socday kulanka, Guddiga ayaa mas’uuliyiinta Wasaaradda weydiiyey su’aalo la xiriira wax-ka-beddelka Xeerka Tayodhawrka Badeecadaha Puntland, si loo hubiyo in xeerkaasi uu waafaqsan yahay baahiyaha ganacsiga iyo ilaalinta tayada badeecadaha. Mas’uuliyiinta Wasaaradda ayaa dhankooda faahfaahin ka bixiyey dhammaan su’aalihii la weydiiyey, iyagoo muujiyey sida ay uga go’an tahay in la helo xeerar casri ah oo kor u qaada tayada badeecadaha Puntland. Kulamadan ayaa qayb ka ah dardargelinta xeerarka kala duwan ee horyaala Golaha, si loogu diyaariyo in la horgeeyo fadhiyada soo socda ee Golaha Wakiillada. -DHAMMAAD-

Garoowe, 7-da Maajo 2025 – Guddiga Shuruucda, Caddaaladda, Arrimaha Diinta iyo Dastuurka ee Golaha Wakiillada Dowladda Puntland ayaa kulan muhiim ah la yeeshay Ururka Qareennada Haweenka Puntland (PUWLA). Kulankan ayaa diiradda lagu saaray xoojinta wada-shaqeynta labada dhinac iyo sidii loo horumarin lahaa adeegyada sharci ee la xiriira xuquuqda haweenka iyo dadka kaalmada sharci. Intii uu socday kulanka, PUWLA ayaa Guddiga uga warbixisay shaqooyinka ay qabtaan, oo ay ka mid yihiin Bixinta adeegyo sharci oo bilaash ah oo loogu talagalay haweenka, carruurta, caqabadaha jira iyo qorshahooda shaqo. Guddiga Shuruucda ayaa dhankooda muujiyay sida ay uga go’an tahay la shaqeynta PUWLA, iyagoo ballanqaaday in xiriir joogto ah la yeelan doonaan ururka si loo xoojiyo ilaalinta xuquuqda haweenka iyo horumarinta nidaamka caddaaladda. DHAMMAAD –

Garoowe, 6-da Maajo 2025* – Guddiga Golaha Wakiillada Dowladda Puntland ee loo xilsaaray u kuurgelidda xaaladda maxaabiista ayaa maanta booqasho shaqo ku tegey Xabsiga Dhexe ee Garoowe. Xubnaha Guddiga ayaa kulan la yeeshay saraakiisha xabsiga iyo qaar ka mid ah maxaabiista, iyagoo ka xog-wareystay xaaladahooda nololeed, adeegyada ay helaan, iyo tabashooyinka ay qabaan. Xildhibaannada kormeerka sameeyay ayaa kala ahaa Xildhibaan Maxamuud Dhakuul Xirsi, Guddoomiyaha Guddiga Shuruucda, Caddaaladda, Arrimaha Diinta iyo Dastuurka, iyo Xildhibaan Mowliid Abokor Caafi, Guddoomiyaha Guddiga Xuquuqda Insaanka, Haweenka iyo Arrimaha Qoyska. Labada Xildhibaan ayaa carrabka ku adkeeyay muhiimadda ay leedahay ilaalinta xuquuqda maxaabiista iyo horumarinta adeegyada ka jira xabsiga. DHAMMAAD –

Garoowe, Maajo 05, 2025: Guddoomiyaha Golaha Wakiillada Dawladda Puntland Mudane, Hon Abdirisak Ahmed Said oo uu weheliyo Guddoomiye ku-xigeenka 2-aad Mudane, Hon Mohamed Mahamud Esse ayaa shir-guddoomiyey fadhiga 6-aad ee Guddiga Joogtada ah. Fadhiga maanta waxaa dulmar guud lagu sameeyey qodobadii looga hadlay fadhigii hore ee guddiga joogtada wixii ka qabsoomay iyo tallaabooyinka la qaaday, intaas kadib waxaa Madax guddiyeedyada Golaha Wakiillada looga dhegaystay warbixinno la xiriira, Dhaqaalaha, Amniga, Cadaaladdda, Mashaariicda, Xuquuqada Aadanaha iyo Kaabayaasha Dhaqaalaha, si waafaqsan Dastuurka & Xeer-hoosaadka Golaha Wakiillada. Dhinaca kale, iyadoo laga duulayo xog ogaal u noqoshada xaaladda Xabsiyada iyo Maxaabiista, waxaa Guddiga Joogtada ahi magacaabeen guddi gaar ah oo u kuurgala xaaladda Xasbiyada iyo Maxaabiista, iyagoo warbixintooda la soo wadaagi doona Guddiga Joogtada ah. Ugu dambayn, waxaa Guddigu dood ka yeeshay qorshayaasha hortebinta leh ee Golaha, iyadoo isla qaatay dardar-dargelinta shaqada guddiyadu ay gacanta ku hayaan. -DHAMMAAD