Golaha Wakiillada

Guddiyada

Guddiga Hawlaha Guud, Gaadiidka, Ganacsiga iyo Kaabayaasha Dhaqaalaha ee Golaha Wakiillada Dowladda Puntland.

Garoowe, 14-ka Maajo 2025 — Guddiga Hawlaha Guud, Gaadiidka, Ganacsiga iyo Kaabayaasha Dhaqaalaha ee Golaha Wakiillada Dowladda Puntland ayaa maanta kulan muhiim ah la yeeshay mas’uuliyiinta Wasaaradda Ganacsiga, Warshadaha iyo Maalgashiga Puntland. Kulankan ayaa diiradda lagu saaray , wax-ka-beddelka Xeerka Tayodhawrka Badeecadaha Puntland, iyadoo Guddigu uu ka duulayo waajibaadyada shaqo ee uu u xilsaaran yahay. Intii uu socday kulanka, Guddiga ayaa mas’uuliyiinta Wasaaradda weydiiyey su’aalo la xiriira wax-ka-beddelka Xeerka Tayodhawrka Badeecadaha Puntland, si loo hubiyo in xeerkaasi uu waafaqsan yahay baahiyaha ganacsiga iyo ilaalinta tayada badeecadaha. Mas’uuliyiinta Wasaaradda ayaa dhankooda faahfaahin ka bixiyey dhammaan su’aalihii la weydiiyey, iyagoo muujiyey sida ay uga go’an tahay in la helo xeerar casri ah oo kor u qaada tayada badeecadaha Puntland. Kulamadan ayaa qayb ka ah dardargelinta xeerarka kala duwan ee horyaala Golaha, si loogu diyaariyo in la horgeeyo fadhiyada soo socda ee Golaha Wakiillada. -DHAMMAAD-

Guddiga Hawlaha Guud, Gaadiidka, Ganacsiga iyo Kaabayaasha Dhaqaalaha ee Golaha Wakiillada Dowladda Puntland. Read More »

Guddiga Shuruucda, Caddaaladda, Arrimaha Diinta iyo Dastuurka ee Golaha Wakiillada Dowladda Puntland.

Garoowe, 7-da Maajo 2025 – Guddiga Shuruucda, Caddaaladda, Arrimaha Diinta iyo Dastuurka ee Golaha Wakiillada Dowladda Puntland ayaa kulan muhiim ah la yeeshay Ururka Qareennada Haweenka Puntland (PUWLA). Kulankan ayaa diiradda lagu saaray xoojinta wada-shaqeynta labada dhinac iyo sidii loo horumarin lahaa adeegyada sharci ee la xiriira xuquuqda haweenka iyo dadka kaalmada sharci. Intii uu socday kulanka, PUWLA ayaa Guddiga uga warbixisay shaqooyinka ay qabtaan, oo ay ka mid yihiin Bixinta adeegyo sharci oo bilaash ah oo loogu talagalay haweenka, carruurta, caqabadaha jira iyo qorshahooda shaqo. Guddiga Shuruucda ayaa dhankooda muujiyay sida ay uga go’an tahay la shaqeynta PUWLA, iyagoo ballanqaaday in xiriir joogto ah la yeelan doonaan ururka si loo xoojiyo ilaalinta xuquuqda haweenka iyo horumarinta nidaamka caddaaladda. DHAMMAAD –

Guddiga Shuruucda, Caddaaladda, Arrimaha Diinta iyo Dastuurka ee Golaha Wakiillada Dowladda Puntland. Read More »

Guddiga Golaha Wakiillada Dowladda ee loo xilsaaray u kuurgelidda xaaladda maxaabiista ayaa maanta booqasho shaqo ku tegey Xabsiga Dhexe ee Garoowe.

Garoowe, 6-da Maajo 2025* – Guddiga Golaha Wakiillada Dowladda Puntland ee loo xilsaaray u kuurgelidda xaaladda maxaabiista ayaa maanta booqasho shaqo ku tegey Xabsiga Dhexe ee Garoowe. Xubnaha Guddiga ayaa kulan la yeeshay saraakiisha xabsiga iyo qaar ka mid ah maxaabiista, iyagoo ka xog-wareystay xaaladahooda nololeed, adeegyada ay helaan, iyo tabashooyinka ay qabaan. Xildhibaannada kormeerka sameeyay ayaa kala ahaa Xildhibaan Maxamuud Dhakuul Xirsi, Guddoomiyaha Guddiga Shuruucda, Caddaaladda, Arrimaha Diinta iyo Dastuurka, iyo Xildhibaan Mowliid Abokor Caafi, Guddoomiyaha Guddiga Xuquuqda Insaanka, Haweenka iyo Arrimaha Qoyska. Labada Xildhibaan ayaa carrabka ku adkeeyay muhiimadda ay leedahay ilaalinta xuquuqda maxaabiista iyo horumarinta adeegyada ka jira xabsiga. DHAMMAAD –

Guddiga Golaha Wakiillada Dowladda ee loo xilsaaray u kuurgelidda xaaladda maxaabiista ayaa maanta booqasho shaqo ku tegey Xabsiga Dhexe ee Garoowe. Read More »

Fadhiga 6-aad ee Guddiga Joogtada ah

Garoowe, Maajo 05, 2025: Guddoomiyaha Golaha Wakiillada Dawladda Puntland Mudane, Hon Abdirisak Ahmed Said oo uu weheliyo Guddoomiye ku-xigeenka 2-aad Mudane, Hon Mohamed Mahamud Esse ayaa shir-guddoomiyey fadhiga 6-aad ee Guddiga Joogtada ah. Fadhiga maanta waxaa dulmar guud lagu sameeyey qodobadii looga hadlay fadhigii hore ee guddiga joogtada wixii ka qabsoomay iyo tallaabooyinka la qaaday, intaas kadib waxaa Madax guddiyeedyada Golaha Wakiillada looga dhegaystay warbixinno la xiriira, Dhaqaalaha, Amniga, Cadaaladdda, Mashaariicda, Xuquuqada Aadanaha iyo Kaabayaasha Dhaqaalaha, si waafaqsan Dastuurka & Xeer-hoosaadka Golaha Wakiillada. Dhinaca kale, iyadoo laga duulayo xog ogaal u noqoshada xaaladda Xabsiyada iyo Maxaabiista, waxaa Guddiga Joogtada ahi magacaabeen guddi gaar ah oo u kuurgala xaaladda Xasbiyada iyo Maxaabiista, iyagoo warbixintooda la soo wadaagi doona Guddiga Joogtada ah. Ugu dambayn, waxaa Guddigu dood ka yeeshay qorshayaasha hortebinta leh ee Golaha, iyadoo isla qaatay dardar-dargelinta shaqada guddiyadu ay gacanta ku hayaan. -DHAMMAAD

Fadhiga 6-aad ee Guddiga Joogtada ah Read More »

Fadhiga 5-aad ee Guddiga Joogtada ah.

Garoowe, April 28, 2025: Guddoomiyaha Golaha Wakiillada Dawladda Puntland Mudane, Hon Abdirisak Ahmed Said, oo uu weheliyo Guddoomiye ku-xigeenka 2-aad Mudane, Hon Mohamed Mahamud Esse ayaa shir-guddoomiyey fadhiga 5-aad ee Guddiga Joogtada ah. Fadhiga maanta Guddoomiyaha Golaha Wakiillada ayaa warbixin ka siiyey guddiga joogtada ah safar uu ku tagey magaalada Nairobi, halkaasoo uu kulamo kula yeeshay siyaasiyiinta iyo hay’adaha taageera Baarlamaannada Kulamadaas oo ku soo dhammaaday guul iyo is afgarad. Intaas kadib, madax-gudiyeedyada Golaha Wakiillada ayaa looga dhegeystey warbixinno ku saabsan waxqabadyada guddiyada ee la xiriira Bulshadda, Xuquuqada Aadanaha, Arrimaha Deegaanka, Nabadeynta, Amniga, Caddaaladda, dhaqaalaha iyo qorsheyaasha ay gacanta ku hayaan. Intii kulanku uu socdey waxaa lagu soo bandhigay xeerarka guddiyadu ay gacanta ku hayaan kuwasoo u bahaan in la dhammaystiro ka hor fadhiga bisha Juun, 2025, iyadoo latashi lagala samaynayo daneeyayasha kala duwan ee xeerarka, waxayna ka yihiin 1. Hindise-Xeereedka Maamulka Dakhliga Dawladda Puntland. 2. Hindise-Xeereedka Bangiga Dawladda iyo Hay’adaha Maaliyadda Puntland. 3. Wax-ka-baddelka xeerka Tayo dhawrka Badeecadaha. 4. Wax-ka-baddelka Xeerka Xabsiyada Puntland. 5. Wax-ka-baddelka Xeerka Hab-maamuuska Dawladda Puntland. Dhinaca kale, waxaa guddiga joogtada ah lala wadaagay xeerarka goluhu go’aamiyey in wax-ka-baddel lagu sameeyo ee loo gudbiyey hay’adaha ay khuseeyaan, kuwasoo u baahan in guddiyadu dabagal ku sameeyaan, meesha ay marayaan iyo shaqada laga qabtey. Ugu dambayn, waxaa guddigu ka doodey go’aanna ka gaarey qorshaha kormeerka gobollada iyo degmooyinka Puntland iyo u diyaargarowga kalfadhiga 56-aad ee Golaha Wakiillada iyo sidii guddiyadu ay doorkooda uga qaadan lahaaweeyn. DHAMMAAD – Wixii faah-faahin ah kala xiriir: Xafiiska Warfaafinta iyo Wacyigelinta Golaha Wakiillada Dowladda Puntland.

Fadhiga 5-aad ee Guddiga Joogtada ah. Read More »

Xubnaha Guddiga Joogtada ah ee Golaha Wakiillada Dawladda Puntland

Boosaaso, February 21, 2025 – Xubnaha Guddiga Joogtada ah ee Golaha Wakiillada Dawladda Puntland, oo maalmahan howlo shaqo u jooga magaalada Boosaaso, ayaa kormeer ku tagay Dekadda Boosaaso si ay ugu kuur-galaan habsami u socodka shaqooyinka ka socda. Intii uu socday kormeerka, Guddigu waxa ay warbixinno ka dhageysteen Maareeyaha Dekadda, Madaxda Wasaaradda Maaliyadda ee Dekadda, iyo saraakiisha amniga. Waxay si gaar ah diiradda u saareen qaabka dakhliga loo ururiyo, caqabadaha jira, iyo qorshayaasha horumarineed ee la xiriira dekadda. Guddiga ayaa masuuliyiinta su’aalo ka weydiiyey arrimahaas, iyagoo adkeeyey muhiimadda ay leedahay in dakhliga dekadda loo aruuriyo si hufan oo waafaqsan nidaamka maamul wanaagga. Kormeerkan shaqo ayaa qeyb ka ah waajibaadka Guddiyada Golaha Wakiillada Puntland, sida uu farayo Qodobka 64aad ee Dastuurka Dawladda Puntland. DHAMMAAD Xafiiska Warfaafinta & Wacyi-gelinta Golaha Wakiillada Dawladda Puntland

Xubnaha Guddiga Joogtada ah ee Golaha Wakiillada Dawladda Puntland Read More »

Fadhiga Guddiga Joogtada ah ee Golaha Wakiillada.

Garoowe, Janaayo 27, 2025: Guddoomiyaha Golaha Wakiillada Dawladda Puntland Mudane Hon Abdirisak Ahmed Said, ayaa shir-guddoomiyey fadhiga Guddiga Joogtada ah ee Golaha Wakiillada, kaas oo looga hadlay amniga guud ee Puntland, hawlgalka Ciribtirka Argagixisada Puntland, iyo qodobo kale oo muhiim ah. Ugu horreyn, Guddiga ayaa boggaadiyey Ciidanka naftood hurayaasha ah ee Puntland ee ku mideysan hawlgalka Hillaac ee ka socda Buuraha Cal-miskaad ee Gobolka Bari, waxayna ciidamada ugu hambalyeeyeen guulaha isdaba-joogga ah iyo sida ay ugu guuleysteen argagixisadii ku dhuumaalaysanaysay Buuralayda Calmiskaad ee Gobolka Bari. Guddiga ayaa eebbe uga baryay in uu janadiisa geeyo dhammaan shuhadada ku shahiiday intii lagu jiray hawlgalkan, iyagoo u dagaalamayey difaaca dalka, dadka, iyo diinta, waxaana sidoo kale ay u rajaynayaan in Eebbe ku boggsiiya dhammaan kuwa ku dhaawacmay hawlgalkan. Guddiga ayaa sidoo kale bogaadiyey doorka ay shacabka Puntland qeybaha kala duwan uga muujiyeen taageerada ay u muujinayaan ciidamada geesiyaasha ah ee ku jira hawlgalkan, waxayna ku booriyey in shacabka iyo Qurba-joogta ay si dhow ula shaqeeyaan ciidanka, muwaadin kastaana uu ka qeybqaato hawlgalkan isagoo ku taageeraya awoodiisa, sida xoog, xoolo, xeelad, iyo xog. Dhinaca kale, Guddiga ayaa baaq nabadeed u diray beelaha walaalaha ah ee ku dagaalamaya Gobolka Mudug, iyagoo ugu baaqay in colaadda la joojiyo, isla markaana lagu bedelo, nabad, walaalnimo iyo daris wanaag. Guddiga Joogtada Golaha Wakiillada ayaa sidoo kale soo jeediyey in la mideeyo dedaallada nabadeed ee socda iyo in la fuliyo heshiisyadii hore ee la galay, si xal waara looga gaaro colaaddan muddada dheer socota. Ugu dambeyn, Guddiga ayaa Xukuumadda, hay’adaha caalamiga ah iyo kuwa maxalliga ah u diray baaq ku saabsan in si degdeg ah taageero loo gaarsiiyo shacabka ay si gardarro ah uga soo barakiciyey Maamulka Soomaaliland degmada Ceerigaabo ee Gobolka Sanaag. – DHAMMAAD – Xafiiska Warfaafinta & Wacyi-gelinta Golaha Wakiillada Dawladda Puntland.

Fadhiga Guddiga Joogtada ah ee Golaha Wakiillada. Read More »

SHIR LOOGA HADLAY NAFAQADA IYO WAX-SOOSAARKA OO KA QABSOOMAY GOLAHA WAKIILLADA.

Garoowe, December 31, 2024 – Kulanka Isku-Duwidda ee La Xiriira Ka-Qaybgalka Baarlamaanka ee Dhaqdhaqaaqa Kor u Qaadista Nafaqada Puntland (SUN) ayaa maanta ka dhacay aqalka Golaha Wakiillada Dawladda Puntland. Kulankan ayaa si qoto dheer loogu falanqeeyey sidii loo xoojin lahaa wax-soosaarka gudaha iyo yareynta nafaqo-darrada, waxaana kasoo qaybgalay xubno ka tirsan Guddiyada Golaha Wakiillada. Shirku wuxuu xooga saaray doorka muhiimka ah ee Golaha Wakiillada ee dejinta siyaasadaha iyo sharciyada ka turjumaya baahiyaha bulshada, gaar ahaan kuwa la xiriira nafaqada iyo wax-soosaarka. Waxaa sidoo kale la isla gartay in la xoojiyo wada shaqeynta dowladda, hay’adaha caalamiga ah, iyo bulshada rayidka ah si loo xaqiijiyo horumar waara. Guddoomiyaha Kuxigeenka Guddiga Arrimaha Bulshada, Dhaqanka, Warfaafinta iyo Isgaarsiinta, Xildhibaan Axmed Bille Siciid, iyo Xoghayaha Guud ee Golaha Wakiillada Mudane Cabdirisaaq Xiddig Warsame, ayaa bogaadiyey dadaallada socda ee lagu horumarinayo wax-soosaarka gudaha iyo yareynta nafaqo-darrada. Waxay sidoo kale sheegeen in Golaha Wakiillada uu diyaar u yahay inuu ka qayb qaato hirgelinta qorshayaasha dowladda ee la xiriira arrimahan. Ugu dambeyn, xubnaha guddiyada Golaha Wakiillada ayaa ballanqaaday inay taageeri doonaan dadaallada iyo juhdiga lagu horumarinayo nafaqada iyo wax-soosaarka gudaha, isla markaana ay diyaar u yihiin inay ka qeyb qaataan sameynta sharciyo taageeraya horumarkan. – DHAMMAAD – Xafiiska Warfaafinta & Wacyi-gelinta Golaha Wakiillada Dawladda Puntland

SHIR LOOGA HADLAY NAFAQADA IYO WAX-SOOSAARKA OO KA QABSOOMAY GOLAHA WAKIILLADA. Read More »

Fadhiga 22-aad ee Kalfadhiga 55-aad ee Golaha.

Garoowe, Diseembar 05, 2024 – Guddoomiyaha Golaha Wakiillada Dawladda Puntland, Mudane Hon Abdirisak Ahmed Said, oo uu weheliyo Guddoomiye Ku-xigeenka 2-aad, Mudane Hon Mohamed Mahamud Esse, ayaa maanta shir-guddoomiyay fadhiga 22-aad ee Kalfadhiga 55-aad ee Golaha. Fadhigan ayaa lagu gorfeeyay arrimo muhiim ah oo ay ka mid yihiin nidaamka Federaalka iyo tallaabadii sharci-darrada ahayd ee loo bedelay Dastuurkii 2012 ee heshiiska lagu ahaa. Golaha Wakiillada Puntland ayaa ku eedeeyay Dowladda Federaalka inay ku xadgudubtay Dastuurkii lagu heshiiyay, iyagoo tilmaamay in wax-ka-beddel lagu sameeyay si sharci-darro ah. Guddoomiyaha ayaa ku adkeeyay muhiimadda ay leedahay ilaalinta Dastuurka 2012, isagoo sheegay in wax-ka-beddel aan loo dhammayn uu keeni karo khilaaf iyo kala qeybsanaan. Goluhu waxa uu carabka ku adkeeyay in tallaabooyinkan ay dhaawici karaan nidaamka lagu heshiiyay. Si loo helo xal waara, Golaha Wakiillada ayaa go’aamiyay in doodda in talo soo jeedinta ku saabsan arrintan loo xil saaro Guddiga gaar ah oo ka soo talo bixiya arrimaha Federaalka dalka Soomaaliya, go’aanna ku soo celiya Golaha Wakiillada Dawladda Puntland. -DHAMMAAD – Xafiiska Warfaafinta iyo Wacyi-gelinta Golaha Wakiillada Dowladda Puntland

Fadhiga 22-aad ee Kalfadhiga 55-aad ee Golaha. Read More »

Guddiga Maaliyadda, Dhaqaalaha, iyo Xisaabaadka ee Golaha Wakiillada Dawladda Puntland.

Garoowe, December 02, 2024: Guddoomiye ku xigeenka 2aad ee Golaha Wakiillada Puntland, Hon Mohamed Mahamud Esse, ayaa caawa si rasmi ah u furay kulan muhiim ah oo ay Guddiga Maaliyadda, Dhaqaalaha, iyo Xisaabaadka ee Golaha Wakiillada Dawladda Puntland la yeesheen ururada bulshada rayidka ah ee ka hawlgala Puntland. Kulankan, oo ka dhacay Hotel Martisoor, ayaa si qoto dheer looga hadlay miisaaniyadda sannadka 2025 iyo sida loogu wajihi karo baahiyaha bulshada ee muhiimka ah. Guddoomiye ku xigeenka, 2-aad Maxamed Maxamuud Ciise, oo ka hadlay kulanka, ayaa iftiimiyay muhiimadda ay leedahay in miisaaniyadda cusub ee 2025 ay si buuxda uga turjumeyso baahiyaha shacabka Puntland, iyadoo la tixgelinayo adeegyada aasaasiga ah sida caafimaadka, waxbarashada, iyo daryeelka bulshada. Waxa uu sidoo kale xusay in miisaaniyadda loo baahan yahay inay noqoto mid waafaqsan qorshayaasha horumarineed ee dalka, iyadoo si hufan loo maamulayo khayraadka iyo agabka Dawladda. Intii uu socday kulanka, Guddiga iyo ururada bulshada rayidka ah ayaa si wadajir ah uga dooddayn sidii loo xoojin lahaa wada-shaqeynta iyo in miisaaniyadda loo qorsheeyo si ay uga jawaabto duruufaha gaarka ah ee bulshada, iyadoo la dhisayo nidaam maaliyadeed oo hufan oo waxtar leh. Waxaa sidoo kale la isku raacay in la tixgeliyo talooyinka ururada bulshada si loo helo miisaaniyad waafaqsan baahiyaha shacabka. Kulankan wuxuu qeyb ka yahay dadaallo hore oo ay Guddigu ku sameeyeen kulammo lala yeeshay hay’adaha kala duwan ee Dawladda iyo bulshada rayidka ah, kuwaas oo laga dhageystay talooyin iyo aragtiyo ku saabsan sida loo horumarin karo adeegyada bulshada iyo xoojinta maamul-wanaagga. Waxaa la rajeynayaa in kulamadan ay ka qayb qaataan dhisidda miisaaniyad waxtar leh oo ka turjumaysa rabitaanka iyo baahiyaha shacabka Puntland. – DHAMMAAD – Xafiiska Warfaafinta iyo Wacyi-gelinta Golaha Wakiillada Dawladda Puntland

Guddiga Maaliyadda, Dhaqaalaha, iyo Xisaabaadka ee Golaha Wakiillada Dawladda Puntland. Read More »

Scroll to Top