Kala fadhiyada

Garowe, Nofembar 17, 2024 – Guddoomiyaha Golaha Wakiillada Puntland, Mudane Cabdirisaaq Axmed Siciid, oo uu wehliyo Guddoomiye Ku-xigeenka 2-aad, Mudane Maxamed Maxamuud Ciise, ayaa maanta shir-guddoomiyey fadhiga 13-aad ee Kalfadhiga 55-aad ee Golaha Wakiillada, kaas oo lagu la xisaabtay Wasaaradda Gargaarka iyo Maareynta Masiibooyinka Puntland. Fadhiga oo diiradda lagu saaray waxqabadka iyo waajibaadka Wasaaradda, ayaa waxaa hortimid Wasiirka Wasaaradda, Marwo Ubax Cabdirashiid, Wasiir Ku-xigeenka Axmed Siciid Qaloonbi, iyo saraakiil kale oo ka tirsan Wasaaradda, oo ay ku jiraan Agaasimaha Guud iyo Agaasimeyaasha Waaxyaha. Ugu horayn, Wasiirka ayaa Golaha ka hor akhrisay warbixin ka hadlaysa Wasaaradda, shaqooyinka ay qabteen. Intaa kadib,Xildhibaannada Golaha Wakiillada ayaa Wasiirka weydiiyey su’aalo ku saabsan sida ay uga jawaabtay xaaladaha masiibooyinka ee ka dhacay Puntland, sida fatahaadaha iyo abaaraha, Tallaabooyinka loo qaaday ka hortagga masiibooyinka iyo diyaarinta adeegyo degdeg ah oo wax-ku-ool ah. Iskaashiga iyo Hufnaanta: Habka ay Wasaaraddu ula shaqeyso hay’adaha maxalliga ah iyo kuwa caalamiga ah, iyo sidii loo xaqiijin lahaa hufnaanta maamulidda miisaaniyadda. Wasiirka Wasaaradda Gargaarka iyo Maareynta Masiibooyinka, Marwo Ubax Cabdirashiid, ayaa uga jawaabtay su’aalaha Golaha, iyadoo soo bandhigtay waxqabadka Wasaaradda, caqabadaha ay la kulmeen, iyo qorshooyinka lagu xoojinayo waxtarka adeegyada ay bulshada u qabato. Guddoomiyaha Golaha Wakiillada, Mudane Cabdirisaaq Axmed Siciid, ayaa ku bogaadiyey Wasaaradda dadaallada ay ku bixinayso adeegyada gargaarka, isaga oo ku adkeeyey muhiimadda isla xisaabtanka iyo hufnaanta shaqo ee hay’adaha Xukuumadda. Kulankan ayaa qayb ka ah dadaallada Golaha Wakiillada ee lagu xoojinayo isla xisaabtanka iyo hubinta waxtarka adeegyada loo fidiyo bulshada Puntland. – DHAMMAAD – Xafiiska Warfaafinta iyo Wacyi-gelinta, Golaha Wakiillada Dowladda Puntland

Garowe, Nofeembar 16, 2024: Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo uu weheliyo Guddoomiye Ku-xigeenka 1-aad Maxamed Baarri Shire iyo Guddoomiye Ku-xigeenka 2-aad Mudane Maxamed Maxamuud Ciise, ayaa maanta shir guddoomiyey fadhiga 12-aad ee Kalfadhiga 55-aad ee Golaha Wakiillada Puntland. Kulankan ayaa diiradda lagu saaray la xisaabtanka hay’adaha fulinta ee Dawladda Puntland, gaar ahaan kuwa ka shaqeeya sugidda Amniga iyo la dagaallanka kooxaha argagaxisada. Mas’uuliyiin ka tirsan Wasaaradda Amniga iyo DDRta, Taliyeyaasha Ciidanka Booliska iyo Darwiishta, Agaasimaha Hay’adda Nabad-suggida, iyo saraakiil kale oo muhiim ah ayaa kulanka ka qayb galay. Mas’uuliyiintaas ayaa soo bandhigay warbixinno ku saabsan xaaladda guud ee amniga Puntland iyo tallaabooyinka lagu sugayo xasilloonida, iyadoo sidoo kale lagu faah-faahiyay caqabadaha iyo guulaha laga gaaray hawlgallada kala duwan. Warbixinaha ayaa lagu soo bandhigay waxqabadka hay’adaha Amniga, qorsheyaasha lagu xoojinayo badqabka magaalooyinka iyo xuduudaha fogfog, iyo hawlgallada lagu beegsanayo kooxaha khatarta ku haya nabadda. Waxaa sidoo kale la faah-faahiyay dib-u-habeynta xarumaha xabsiyada, hagaajinta daryeelka maxaabiista, iyo hirgelinta nidaamyo waafaqsan xuquuqda aadanaha. Intii uu kulanku socday, Xildhibaannada Golaha Wakiillada ayaa mas’uuliyiinta su’aalo ka weydiiyay arrimo muhiim ah oo ay ka mid yihiin xaaladda guud ee amniga, hawlgallada ciidamada, habka dalacsiinta, mushaarka ciidamada, iyo khasaaraha mararka qaar soo gaara shacabka intii lagu guda jiray hawlgallada. Waxaa sidoo kale laga dooday qorsheyaasha lagu tayeynayo ciidamada kala duwan, oo ay ku jiraan tababarada iyo qalabeynta, si loo hagaajiyo awooddooda fulineed. Mas’uuliyiinta Amniga ayaa ku dheeraaday sharaxaadda hawlgallada socda, qorsheyaasha mustaqbalka, iyo tallaabooyinka lagu xoojinayo wada-shaqeynta hay’adaha kala duwan. Waxay kaloo tilmaameen dedaallada lagu horumarinayo Amniga xuduudaha Puntland, si looga hortago dhaqdhaqaaqyada kooxaha khatarta ah. Xildhibaannada Golaha Wakiillada ayaa ku adkeystay in la dar-dargeliyo wada-shaqeynta hay’adaha amniga iyo bulshada, lana xoojiyo barnaamijyada lagu horumarinayo Amniga, tayeynta xabsiyada, iyo wacyigelinta shacabka si looga hortago khataraha xagjirnimada. Golaha ayaa kula dar-daarmay hay’adaha Amniga sii laba jibaaraan dadaalkooda ku aaddan ka shaqeynta Amniga isla markaana ay kor u qaadaan isku-xirka laamaha amniga si loo xaqiijiyo nabad waarta iyo badbaadada dadka reer Puntland. – DHAMMAAD – Xafiiska Warfaafinta iyo Wacyi-gelinta Golaha Wakiillada Dawladda Puntland.

Garoowe, Nofeembar 5, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo uu weheliyo Guddoomiye Ku-xigeenka 1aad Mudane Maxamed Baarri Shire iyo Guddoomiye Ku-xigeenka 2aad Mudane Maxamed Maxamuud Ciise, ayaa shir-guddoomiyey fadhiga 7-aad ee Kalfadhiga 55-aad ee Golaha Wakiillada Puntland. Fadhigan ayaa diiradda lagu saaray warbixinta kormeeradii Golaha Wakiillada ee gobollada Karkaar, Bari, iyo Raascasayr, oo lagu sameeyay intii u dhaxaysay kalfadhiyada 54aad iyo 55aad. Kormeerkaas ayaa ku qotomay qiimeynta xaaladda adeegyada aasaasiga ah ee bulshada iyo caqabadaha ka jira gobolladaas. Ujeedada kormeerka ayaa ahayd in Golaha Wakiillada uu ka soo ururiyo xog rasmi ah oo ku saabsan baahiyaha bulshada, si loo xaqiijiyo doorka xildhibaannada ee metelaadda shacabka iyo ilaalinta danta guud. Xildhibaannadu waxay la kulmeen bulshooyinka deegaanka, iyagoo dhageystay baahiyadooda iyo cabashooyinkooda, si loo dejiyo qorshayaal wax ku ool ah oo loogu horumarinayo adeegyada waxbarashada, caafimaadka, biyaha, waddooyinka, amniga, iyo garsoorka. Baahiyaha iyo Caqabadaha Taagan Kormeerka ayaa lagu ogaaday caqabado dhowr ah oo ay ka mid yihiin: Waxbarashada: Iskuullo qaar ayaa laheyn gaadiid gaar ah, iyo agabkii waxbarashada ee loo baahnaa, taasoo xaddidaysa fursadaha waxbarasho ee carruurta. Biyaha: Biyo-yari ayaa saameyn ku yeelatay deegaanno badan oo ku yaalla gobollada Puntland, iyadoo tuulooyin badan ku tiirsan yihiin ceelal kooban ama biyo laga soo dhaansado meelaha fog. Caafimaadka: Xarumo caafimaad oo ku filan ayaan jirin gobolladan, waxaana la sheegay in qalab iyo daawooyin kooban ay caqabado ku yihiin bixinta adeegyada caafimaad. Garsoorka iyo Amniga: Baahi weyn ayaa loo qabaa in la xoojiyo laamaha garsoorka iyo booliska si loo sugo amniga iyo cadaaladda bulshada. Waxaa muhiim ah in la dhiso xarumo garsoor oo tayo leh iyo in la kordhiyo tababarada iyo tayada shaqaalaha amniga. Waddooyinka iyo Kaabayaasha: Waddooyin aan la dayactirin ayaa carqaladeeyay isku socodka bulshada, waxayna saameysay adeegyada dawladda, iyadoo loo baahan yahay dhismaha waddooyin cusub iyo xarumo cusub. Beeraha, Kalluunka, iyo Xoolaha: Gobollada Puntland, gaar ahaan Raascasayr, Bari, iyo Karkaar, waxay hodan ku yihiin wax-soosaarka dabiiciga ah ee beeraha, kalluunka, iyo xoolaha. Si kastaba ha noqotee, waxaa jira khataro ka dhalanaya xaalufka sharci-darada ah ee doonyaha kalluumaysiga iyo baahida maalgelinta beero waaweyn, sida beerta timirta ee Gobolka Raascasayr. Xuquuqda Shaqaalaha Dawladda: Shaqaalaha gobolladan waxay wajahaan caqabado la xiriira mushaharka iyo xuquuqda shaqo, taasoo saameyn ku yeelatay bixinta adeegyada dadweynaha. Kormeerka Golaha Wakiillada Puntland wuxuu muujinayaa mas’uuliyadda xildhibaannada ee ku aaddan in ay si dhow ula socdaan xaaladaha gobollada Puntland, una dhaqaajiyaan dadaallada horumarinta adeegyada dadweynaha. Golaha ayaa ballan qaaday inay wax ka qaban doonaan baahiyadan iyo caqabadaha jira, si dhammaan gobollada dalka u helaan adeegyo ku filan oo tayo leh. Shalay waxaa sidoo kale Golaha Wakiillada Puntland la hor keenay warbixintii kormeerka gobollada Hayland, Sanaag, Nugaal, iyo Mudug, halkaas oo ay xildhibaannadu ka soo uruuriyeen xog ku saabsan xaaladda adeegyada bulshada, caqabadaha ka jira, iyo baahiyaha dadka deegaannadaas. Warbixintaas ayaa muujisay in gobolladani ay la wadaagaan caqabadaha dhinacyada waxbarashada, caafimaadka, biyaha, garsoorka, iyo amniga, iyadoo ay Golaha ka go’an tahay in xal waara loo raadiyo arrimahaas.

Garoowe, Nofeembar 4, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo uu weheliyo Guddoomiye Ku-xigeenka 2-aad, Mudane Maxamed Maxamuud Ciise, ayaa maanta shir-guddoomiyey fadhiga 6-aad ee Kalfadhiga 55-aad ee Golaha Wakiillada Dawladda Puntland. Fadhiga waxaa looga hadlay warbixinta kormeeradii ay Golaha Wakiilladu ku tageen gobollada Puntland intii u dhaxeysay labada Kalfadhi ee 54-aad iyo 55-aad. Warbixintan ayaa diiradda lagu saaray xog-ururin iyo xaqiijinta wada-shaqeynta lagu horumarinayo adeegyada muhiimka ah ee bulshada, iyadoo si gaar ah looga hadlay caqabadaha iyo baahiyaha ka jira gobollada ay booqdeen xildhibaanadu. Kormeerka Golaha Wakiillada ayaa kormeer ku tagay gobollada Hayland, Sanaag, Mudug, iyo Nugaal. Warbixinada gobollada Karkaar, Raascasayr, iyo Bari ayaa la soo jeedin doonaa berri, sida uu sheegay Guddoomiyaha Golaha Wakiillada Dawladda Puntland. Kormeerkan waxaa lagu qiimeeyey xaaladda adeegyada muhiimka ah ee bulshada, sida waxbarashada, biyaha, caafimaadka, iyo nabadgelyada, iyadoo xogaha la helay ay ka tarjumayaan baahida loo qabo in adeegyadaasi la tayeyso. Arrimaha Bulshada Goluhu wuxuu muhiimad gaar ah siiyay arrimaha bulshada, gaar ahaan horumarinta waxbarashada, helitaanka biyo nadiif ah, tayeynta caafimaadka, iyo sugidda nabadgelyada. Arrimaha bulshada ayaa ah kuwo muhiim ah oo laf-dhabar u ah horumarinta nolosha shacabka, waxaana Golaha Wakiilladu ku adkeystay inay si dhow ula socdaan hirgelinta adeegyadaas. Arrimaha Garsoorka Golaha Wakiilladu waxay sidoo kale ka hadleen arrimaha garsoorka, iyagoo ka warbixiyey baahida loo qabo in la xoojiyo hufnaanta iyo dhexdhexaadnimada garsoorka si loo xaqiijiyo cadaalad ay ku kalsoon yihiin shacabka Puntland. Fadhiga ayaa lagu adkeeyay muhiimadda ay leedahay in la taageero hay’adaha garsoorka, loona helo nidaam caddaalad ku dhisan oo awood u leh inuu wax ka qabto cabashooyinka shacabka. Arrimaha Kaabayaasha Dhaqaalaha Golaha Wakiilladu waxay mudnaan gaar ah siiyeen arrimaha kaabayaasha dhaqaalaha, gaar ahaan horumarinta waddooyinka isku xira gobollada iyo dayactirka kaabayaasha kale ee muhiimka u ah isu-socodka iyo kobcinta dhaqaalaha. Waxaa la isla gartay in baahi weyn loo qabo maalgelinta iyo daryeelka kaabayaasha si loo xoojiyo dhaqaalaha gudaha iyo ganacsiga Puntland. Waajibaadka Golaha Wakiillada Golaha Wakiillada Dawladda Puntland ayaa fadhiga ku xaqiijiyey inay ka go’an tahay sii wadista la socodka iyo kormeerka adeegyada muhiimka ah, taas oo qayb ka ah waajibaadka loo doortay xildhibaanada Golaha Wakiillada. Masuuliyiinta Baarlamaanka Puntland waxay sii wadi doonaan howshooda ku aaddan daryeelka iyo dabagalka adeegyada bulshada, horumarinta garsoorka, iyo xaqiijinta in kaabayaasha dhaqaale ee gobolka si siman loo gaarsiiyo shacabka Puntland. – DHAMMAAD – Xafiiska Warfaafinta iyo Wacyi-gelinta Golaha Wakiillada Dowladda Puntland

Garoowe, Nofeembar 2, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo ay wehliyaan Guddoomiye Ku-xigeenka 1-aad, Mudane Maxamed Baarri Shire, iyo Guddoomiye Ku-xigeenka 2-aad, Mudane Maxamed Maxamuud Ciise, ayaa maanta shir-guddoomiyey fadhiga 4-aad ee Kalfadhiga 55-aad ee Golaha Wakiillada Puntland. Fadhigan, oo ay ka soo qaybgaleen 55 mudane, ayaa waxaa diiradda lagu saaray dhageysiga warbixinno ay soo jeediyeen afar ka mid ah guddiyada Golaha Wakiillada, kuwaas oo dhawaan kormeerro ku sameeyey hay’adaha Dawladda iyo Gobollada dalka. Guddiyadda ayaa kala ah. 1. Guddiga Xuquuqul insaanka, Haweenka & Arrimaha Qoyska Golaha Wakiillada 2. Guddiga Anshaxa iyo Arrimaha Golaha Wakiillada 3. Guddiga Hawlaha Guud, Gaadiidka,Ganacsiga & Kaabayaasha Dhaqaalaha ee Golaha Wakiillada 4. Guddiga Arrimaha Gudaha, Federaalka & Dimuqraadiyadda ee Golaha Wakiillada – DHAMMAAD – Xafiiska Warfaafinta iyo Wacyi-gelinta Golaha Wakiillada Dowladda Puntland

Garoowe, Oktoobar 30, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo ay weheliyaan Guddoomiye ku-xigeenka 1-aad Mudane Maxamed Baarri Shire, iyo Guddoomiye ku-xigeenka 2aad Mudane Maxamed Maxamuud Ciise, ayaa maanta shir-guddoomiyey fadhiga 2-aad ee Kalfadhiga 55-aad ee Golaha Wakiillada waxaana fadhigan ka soo qaybgalay 57 mudane. Fadhiga maanta, Xildhibaannada Golaha Wakiilladu waxay cod gacan-taag ah mid mid ugu codeeyeen una ansixiyeen ajandaha rasmiga ah ee Kalfadhiga 55-aad kaas oo goluhu ku hawlgeli doono inta uu kalfadhigan socdo. Ajandaha rasmiga ah ee Kalfadhiga 55-aad ayaa waafaqsan qodobka 42-aad farqadiisa 4aad ee Xeer-hoosaadka Golaha kaas oo dhigaya in ajandaha qabyo-qoraalka ah ee kalfadhigu uu Golaha la horkeeno ayna Xildhibaannadu ka doodaan ka hor ansixinta ajandaha rasmiga ah. Cod gacan-taag ah oo la qaaday, waxaa ajandaha ansixiyey 50 xildhibaan, halka uu diiday 1 mudane, waxaana ka aamusay 6 mudane. Maalinta berri, Oktoobar 31, 2024, oo ay mudanayaashu yeelan doonaan fadhiga 3-aad ee kalfadhigan, ayaa si rasmi ah loogu qaybin doonaa ajandaha rasmiga ah ee maanta la ansixiyey, haddii Alle idmo. Ajandahan ayaa xambaarsan qodobbo muhiim ah oo Golaha Wakiillada Dawladda Puntland kaga arrinsan doono hawlaha muhiimka ah ee horyaalla xilligan. DHAMMAAD Xafiiska Warfaafinta & Wacyi-gelinta Golaha Wakiillada Dawladda Puntland

Garoowe, Oktoobar 27, 2024 – Guddoomiyaha Golaha Wakiillada Dawladda Puntland, Mudane Hon Abdirisak Ahmed Said, oo ay weheliyaan Guddoomiye Ku-xigeenka 2aad, Mudane Hon Mohamed Mohamoud Isse, iyo xubnaha Guddiga Joogtada ee Golaha Wakiillada Puntland, ayaa maanta si rasmi ah u qaabilay xubno ka socda labada Aqal ee Baarlamaanka Jamhuuriyadda Federaalka Soomaaliya, kadib markii ay kormeer ku soo mareen qaybaha kala duwan ee Aqalka Golaha Wakiillada Dawladda Puntland. Kormeerkani wuxuu ku saabsanaa in Xubnaha labada Aqal ee BJFS si dhow ugu kuurgalaan shaqooyinka Golaha Wakiilladda DPL & habraacyada maamul ee xafiisyada kala duwan. Wafdiga Baarlamaanka JFS ayaa kormeerkooda ku bilaabay Xafiiska Guddoonka Golaha Wakiillada, halkaas oo ay ka war heleen qaab-dhismeedka iyo istaraatiijiyada shaqo ee xafiiska. Sidoo kale, waxay soo booqdeen Xafiisyada Hawl-wadeennada iyo hoolalka shirarka ee Guddiyada, Martida iyo Hoolka weyn ee Golaha. Kulankan muhiimka ah ayaa diiradda lagu saaray xoojinta wada-shaqaynta iyo xiriirka qotoda dheer ee ka dhaxeeya Golaha Wakiillada Dawladda Puntland iyo Labada Aqal Baarlamaanka Jamhuuriyadda Federaalka Soomaaliya, iyadoo mudnaanta la siinayo hirgelinta iyo dardargelinta iskaashiga ku saleysan dastuurka iyo shuruucda dalka. Madaxda labada dhinac waxay ka wada hadli doonaan inta ay ku sugan yihiin Garoowe muhiimadda ay leedahay in xiriirka Dawladnimo lagu saleeyo qiyamka wadajirka, horumarka, iyo ilaalinta mas’uuliyadda wadaagga ah ee u dhexeysa Dawladda Federaalka iyo Dawladaha xubnaha ka ah. Kulanku wuxuu diiradda saarayay sidii loo xoojin lahaa wada-shaqaynta mustaqbalka, taas oo muhiim u ah dhisidda xiriir waara oo daahfuran, kor u qaadidda adeegyada bulshada, xoojinta amniga, iyo dardargelinta qorsheyaasha horumarineed ee Puntland iyo guud ahaan Jamhuuriyadda Federalka ee Soomaaliya. — DHAMMAAD — Xafiiska Warfaafinta iyo Wacyigelinta Golaha Wakiillada Dowladda Puntland https://fb.watch/vucPXZNCE0

Garoowe October 24, 2024 –Furitaanka Kal-fadhiga 55-aad waxaa ka soo qeyb galay Madaxweynaha Dawladda Puntland Mudane Siciid Cabdullahi Deni, Madaxweyne ku-xigeenka DPL Ilyaas Cismaan Lugatoor, Guddoomiye ku-xigeenka 1-aad Golaha Wakiilladda Mudane, Maxamed Baarri Shire, Guddoomiye ku xigeenka 2-aad ee Golaha Wakiiladda Mudane, Maxamed Maxamuud Ciise, Guddoomiyaha Maxkamadda Sare, Xildhibaanada Golaha Wakiillada Puntland, Xubno kamid ah laba Aqal Baarlamaanka Federaalka Soomaaliya, Golaha Xukumadda, Golaha Garsoorka, Xafiiska Difaacaha Xuquuqda Aadanaha, Duqa Degmada Garoowe, Isimo, Cullimo, Hay’adaha Caalamiga ah, Dalladda Ururrada Bulshada Rayidka ah, Saraakiisha Ciidamada, Hawl-wadeennada Madaxtooyada, iyo marti sharaf kale. Guddoomiyaha Golaha Wakiillada Dawladda Puntland Mudane, Hon Abdirisak Ahmed Said ayaa khudbadiisa diiradda ku saaray waxqabadka Baarlamaanka 6-aad ee dhinacyada Metelaadda, Xeer-dejinta, Korjoogtaynta hay’adaha Dawladda iyo kobcinta Awoodda Xafiis ee Golaha Wakiillada. Madaxweynaha Dawladda Puntland Mudane Siciid Cabdullahi Denni ayaa khudbad Dastuuri ah ka jeediyay Kalfadhiga furay ayaa khudbadiisa Dastuuriga ah ka jeediyey Furitaanka Kalfadhiga 55-aad ee Golaha Wakiillada, isagoona si rasmi ah u furay Kalfadhiga sida uu qabo qodobka 80-aad farqadiisa 12-aad ee Dastuurka Dawladda Puntland. – DHAMMAAD – Xafiiska Warfaafinta iyo Wacyigelinta Golaha Wakiillada Dowladda Puntland.