Wararka

Garoowe, November 03,2022: Guddoomiyaha Golaha Wakiillada DPL, Mudane Cabdirashiid Yuusuf Jibriil ayaa Garoowe ku soo dhaweeyey Guddoomiyaha Golaha Shacabka BFS ahna ku-simaha Madaxweynaha JFS, Mudane Sh.Aadan Maxamed Nuur (Madoobe) iyo wefti uu hoggaaminayo oo kasoo kicitimay Muqdisho. Munaasabada Soo dhaweynta oo ka dhacday Garoonka Diyaaradaha Gen. Maxamed Abshir ayaa sidoo kale waxaa qayb galay Guddoomiye ku-xigeenka 1-aad Golaha Wakiillada DPL Mudane Cabdicasiis Cabdullahi Cusmaan, Guddoomiye ku-xigeenka 2-aad Mudane Ismaaciil Maxamed Warsame, Guddoomiyaha Gobolka Nugaal, Duqa Garoowe, Xildhibaanno ka tirsan Golaha Wakiillada DPL, Wasiiro ka tirsan Golaha Xukuummada Puntland, Xildhibaanno kamid ah DFS, Saraakiil & dadweyne kale. Safarka Guddoomiyaha Golaha Shacabka BFS uu ku yimid Puntland waxaa ku wehliya Guddiga Joogtada ah ee Golaha Shacabka BFS, iyadoo inta Garoowe joogaan ka shaqeyn doonaan nidaaminta Xeer-hoosaadka Golaha Shacabka, Waxaana sanadihii hore shirarkan lagu qaban jiray dalka dibadiisa. Weftiga Guddooniyaha Golaha Shacabka ayaa markii ay soo degeen waxaa loo gudbiyey qaybta nasiinada ee Garoonka, halkaas oo ay kula hadleen Warbaahinta, iyagoo faah faahin ka bixiyey safarkooda iyo mudada uu qaadan doono. Guddoomiyaha Golaha Wakiillada Puntland oo soo dhaweeyey weftiga ayaa uga warbixiyey xaalada Puntland oo ah mid wanaagsan, isagoo sheegay inta ay joogan Garoowe weftiga Guddoomiyaha Golaha Shacabka ay ku marti qaadi doonaan kalfadhiga 51-aad ee Golaha Wakiillada Puntland oo socda xilligan. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland.

Guddoomiyaha Golaha Wakiillada DPL, Mudane Cabdirishiid Yuusuf Jibriil ayaa magacaabay Guddiga soo dhaweynta Guddoomiyaha Golaha Shacabka BJFS, Mudane, Sheekh Aadan Maxamed Nuur (Madoobe) & Wefti uu hoggaaminayo oo ku soo wajahan Puntland 3-da bishan.

Garoowe: 31,October,2022: Guddoomiyaha Golaha Wakiillada DPL, Mudane Cabdirashiid Yuusuf Jibriil oo ay wehliyaan Ku-xigeenka 1-aad Mudane Cabdicasiis Cabdullahi Cusmaan iyo Ku-xigeenka 2-aad Mudane Ismaaciil Maxamed Warsame ayaa maanta shir Guddoomiyey fadhiga 6-aad, Kalfadhiga 51-aad ee Golaha Wakiillada Dawladda Puntland. Fadhiga maanta ayaa waxaa lagu soo gaba-gabeeyey warbixinada Guddiyada Golaha,  Waxaana la dhageystay 3 Guddi oo kala ah. 1. Guddiga Amniga & Nabadgalyada. 2. Guddiga Arrimaha Bulshada, Dhaqanka, Warfaafinta & Isgaarsiinta Warbixin 3. Guddiga Arrimaha Gudaha, Federaalka & Dimuqraadiyadda. Warbixin Guddiyadda ayaa soo jeediyay warbixin la xiriirta dhammaan Kormeerada ay ku tageen Wasaaradaha, Hay’adaha Dawladda iyo socdaalkii U Kuur-gelida Gobolada dalka. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland

Garoowe: 27,October,2022: Guddoomiyaha Golaha Wakiillada DPL Mudane Cabdirashiid Yuusuf Jibriil oo ay wehliyaan Guddoomiye ku-xigeenka 1-aad Mudane Cabdicasiis Cabdullahi Cusmaan & Guddoomiye ku-xigeenka 2-aad Mudane Ismaaciil Maxamed Warsame ayaa maanta shir guddoomiyey fadhiga 3-aad ee Kalfadhiga 51-aad Golaha Wakiillada Dawladda Puntland. Kulanka maanta waxaa Xildhibaannada loogu qaybiyey Ajandaha rasmiga ah ee Kalfadhiga 51-aad, si waafaqsan qodobka 42-aad farqadiisa 4-aad ee Xeer hoosaadka Golaha Wakiillada, iyada oo ay soo diyaariyeen Shir Guddoonka Golaha. Sidoo kale Kulanka maanta waxaa Golaha laga hor akhriyey warbixinta Guddiga joogtada ah ee Kalfadhiga 51-aad, warbixintaas oo ku saabsanayd waxqabadka Guddiga joogtada ah ee muddadii u dhaxeysay labada Kalfadhi. DHAMMAAD Xafiiska Warfaafinta & Wacyi-gelinta,Golaha Wakiillada Dawladda Puntland.

Garoowe: 25,October 2022: Guddoomiyaha Golaha Wakiillada DPL Mudane Cabdirishiid Yuusuf Jibriil iyo Guddoomiye ku-xigeenka 1-aad Mudane Cabcasiis Cabdulaahi Cismaan ayaa maanta aqalka Wakiillada ku qaabilay Guddoomiyaha Gobolka Nugaal iyo Duqa Degmada Garoowe. Kulanka oo ay ka qayb-galeen xubno kamid ah Mudaneyaasha Baarlamanka ee laga soo doorto Gobolka Nugaal ayaa looga hadlay Xaalada guud ee Gobol Nugaal, waxaana Mas’uuliyiinta Gobolka iyo Degmada oo ka warbixiyey Arrimaha Gobolka iyo Degmada ay sheegeen inay si wanaagsan ay u socdaan howlaha shaqo Dawladda Hoose iyo Gobolka Nugaal sida hirgelinta Wadooyinka, bilic soo celinta, Amniga iyo Adeegyada Bulshada. DHAMMAAD Xafiiska Warfaafinta & Wacyi-gelintaGolaha Wakiillada Dawladda Puntland