Guddoomiye Ku-xigeenka 1-aad ayaa maanta si rasmi ah u soo xiray tababarka Dufcadda 10-aad ee Ciidanka Booliiska Puntland.
Gaalkacyo, 01 Juun 2026: Guddoomiye Ku-xigeenka 1-aad ee Golaha Wakiillada Dowladda Puntland, Hon Mohamed Baarri Shire, ayaa maanta si rasmi ah u soo xiray tababarka Dufcadda 10-aad ee Ciidanka Booliiska Puntland, kuwaas oo ka qalin-jebiyay Dugsiga Tababarka Ciidanka Booliiska Gen. Carays Godad ee magaalada Gaalkacyo. Munaasabadda qalin-jebinta ayaa waxaa ka soo qayb galay Taliyaha Ciidanka Booliiska Puntland, xubno ka tirsan Golaha Wakiillada Dowladda Puntland, Golaha Wasiirrada, saraakiil ka tirsan ciidamada kala duwan, maamulka Degmada Gaalkacyo iyo marti sharaf kale. Guddoomiye Ku-xigeenka ayaa hambalyo u diray askarta qalin-jebisay, isagoo ku bogaadiyey dadaalka iyo adkaysiga ay muujiyeen muddadii uu tababarku socday. Waxa uu sidoo kale ku boorriyey inay si hufan oo daacadnimo leh ugu adeegaan shacabka iyo dalka, isla markaana door muuqda ka qaataan sugidda amniga, ilaalinta sharciga iyo xoojinta nabadda Puntland. Tababarkan ayaa qayb ka ah dadaallada lagu horumarinayo tayada iyo xirfadaha Ciidanka Booliiska Puntland, si loo helo ciidan aqoon, anshax iyo karti u leh gudashada waajibaadkooda amni ee bulshada. DHAMMAAD