Wararka

Gaalkacyo, October 07 2023: Guddiga Hawlaha Guud, Gaadiidka, Ganacsiga & kaabayaasha dhaqaalaha iyo Guddiga Arrimaha Deegaanka & khayraadka dabiiciga ah oo komeer shaqo ku jooga Gobolka Mudug ayaa maanta u kuurgalay xaaladda guud ee Gobolka Mudug. Guddiyada ayaa waxay kulan la qaateen Guddoomiyaha Gobolka Mudug, ku-xigeenkiisa, Duqa Degmada Gaalkacyo, Xoghayaha Degmada & qaar kamid ah isu-duwayaasha Wasaaradaha ee heer Gobol, iyagoo ka dhageystay warbixin ku saaban xaaladda guud ee Gobolka Mudug sida Amniga iyo Adeegyada bulshada & caqabadaha jira. Ugu dambeyntii, Guddiyada ayaa sheegay in warbixinta kormeerkooda ay hor geyn doonaan fadhiga guud ee Golaha Wakiillada, iyadoo socdaalkani uu qayb ka yahay kormeerada Guddiyada ee loogu kuurgalo xaaladaha dalka. DHAMMAAD.

Guddiga Maaliyadda, Dhaqaalaha iyo Xisaabaadka & Guddiga Siyaasadda, Qorsheynta, Horumarinta Dhaqaalaha iyo Xiriirka Caalamiga ah ee Golaha Wakiillada DPL ayaa maanta safar shaqo waxay ku tageen Gobollada Haylaan iyo Karkaar, iyagoo u kuurgalay Xaaladaha guud ee Goboladaas. Guddiyadda oo ugu horeyn tagay magaalada Dhahar ee Gobolka haylaan ayaa waxay kulan la qaateen Guddoomiyaha Gobolka, Duqa degmada, Xoghayaha Dawladda hoose, Taliyaha Qaybta Booliska ee Gobolka, Guddoomiyaha Maxkamadda, Xeer-ilaaliayaha, qaar kamid ah Xildhibaanada Degmada dhahar iyo Isudu-waayaasha heer Gobol. Waxayna mas’uuliyiintu Guddiyadda uga warbixiyeen Xaalada guud ee Gobolka, caqabadaha iyo baahiyaha jira, waxaana ugu dambeyn Guddiyaddu ay kormeer ku sameeyeen saldhiga Degmada Dhahar. Dhanka, kale Guddiyadda ayaa kormeer shaqo ku tagay magaalada Qardho ee Xarunta Gobolka Karkaar, waxayna kulan la qaateen Madaxda Xafiiska Wasaaradda Maaliyadda ee Gobolka karkaar, iyadoo Xisaabiyaha Gobolku uu ka warbixiyey habka shaqadu u socoto, gaar ahaan uruurinta dakhliga, Wax-soosaarka iyo Canshuuraha Gobolka Karkaar. DHAMMAAAD

Garoowe: September 13, 2023: Guddoomiyaha Golaha Wakiillada DPL Mudane, Cabdirashiid Yuusuf Jibriil iyo Madaxa UNDP Soomaaliya Mr Lionel Laurens ayaa shirkooda uga hadlay mashaariicda UNDP ka fuliso Puntland, Doorashooyinkii Goleyaasha Degaanka ee ka qabsoomay Puntland, xoojinta wada shaqeynta Golaha Wakiilladda Dawladda Puntland iyo sidii Hay’adda UNDP taageero buuxda uga geysan lahayd qorshaha Horumarinta Golaha Wakiillada. Kulanka ayaa waxaa sidoo kale goob-joog ka ahaa Xoghayaha guud ee Golaha Wakiilladda iyo Madaxa Xafiiska UNDP ee Garoowe. DHAMMAAD.

Garoowe: September 12, 2023: Guddoomiyaha Golaha Wakiillada DPL Mudane, Cabdirashiid Yuusuf Jibriil oo uu weheliyo ku-xigeenka 2-Mudane, Ismaaciil Maxamed Warsame ayaa maanta shir-Guddoomiyey fadhiga 1-aad ee Guddiga joogtada ah, kaas oo ka qabsoomay xarunta Golaha Wakiillada. Fadhiga maanta Guddiga Joogtada ah ee Golaha Wakiilladu waxay lagu falaqeeyeen arrimo ay mid yihiin Xaaladda Guud ee Siyaasadda, Amniga iyo dhaqalaaha, waxaana warbixinno arrimahaas la xiriira looga dhegeystey madax-guddiyeedyada Guddiga joogtada ah ee u xilsaaran. DHAMAAD Xafiiska Warfaafinta & Wacyi-gelinta, Golaha Wakiillada Dawladda Puntland.

Garoowe, September 09, 2023: Guddoomiyaha Golaha Wakiillada Dawladda Puntland Mudane Cabdirashiid Yuusuf Jibriil oo uu wehliyo Guddoomiye ku-xigeenka 2aad Mudane, Ismail Maxamed Warsame ayaa maanta shir-Guddoomiyey fadhiga 21-aad, Kalfadhiga 52-aad ee Golaha Wakiillada Dawladda Puntland. Ajandaha ayaa ah Ansixinta Xubnaha magacaaban ee Guddiga Doorashooyinka Puntland – PEC sida uu qabo qodobka 113-aad Farqadiisa 1aad, Xarafka X iyo Qodobka 132-aad ee Dastuurka Dawladda Puntland. Kadib markii Xildhibaannada ay dhageysteen Taariikhdooda, waxay cod aqlabiyad ah ku ansixiyeen saddex xubnood oo ka dhinaa Guddiga Doorashooyinka Puntland ee PEC, tirada guud ayaana noqonaysa 12 xubnood. Xildhibaannada ayaa Xasaanadda siiyey Xubnaha Guddiga Doorashooyinka Puntland – PEC, waxaana dhaariyey Garsoore ka socda Maxkamadda sare. Xubnaha ayaa kala ah; 1. Cabdisalam Bashiir Cabdisalam 2. Maxamuud Axmed Caynab (Gubsul) 3. Ubax Cabdullahi Abshir DHAMMAAD Xafiiska Warfaafinta & Wacyi-gelinta Golaha Wakiillada Dawladda Puntland

Garoowe, September 05, 2023: Guddoomiyaha Golaha Wakiillada Dawladda Puntland Mudane Cabdirashiid Yuusuf Jibriil, oo ay wehliyaan Guddoomiye ku-xigeenka 1aad Mudane, Cabdicasiis Cabdullahi Cusmaan iyo Guddoomiye ku-xigeenka 2aad Mudane, Ismail Maxamed Warsame ayaa maanta shir-Guddoomiyey fadhiga 20-aad, Kalfadhiga 52-aad ee Golaha Wakiillada Dawladda Puntland Fadhiga maanta waxaa goob-joog ahaa 40 Xildhibaan, Ajandaha ayaa ah Ansixinta Xubnaha magacaaban ee Guddiga Doorashooyinka Puntland – PEC sida uu qabo qodobka 113-aad Farqadiisa 1aad, Xarafka X iyo Qodobka 132-aad ee Dastuurka Dawladda Puntland. Kadib markii Xildhibaannada ay dhageysteen Taariikhdooda, waxaa cod gacan-taag ah ugu codeeyay Oggol 39 Xildhibaan, Diidmo 1, cid ka aamustayna ma jirin. Xildhibaannada ayaa Xasaanadda siiyey Xubnaha Guddiga Doorashooyinka Puntland – PEC, waxaana dhaariyey Garsoore ka socda Maxkamadda sare. Xubnaha ayaa kala ah; 1. Fu’aad Abshir Axmed 2. Axmed Jaamac Maxamed 3. Axmed Maxamuud Cumar ( KK ) 4. Cabdullaahi Siciid Ismaciil (Keytoon) 5. Maxamed Abshir Garaad 6. Maxamuud Soofe Xassan 7. Cabdullahi Maxamed Barre ( Caato) 8. Marwo Faadumo Siciid Axmed 9. Cabdinuur Maxamuud Maxamed Ubbaale Dhinaca kalena, waxaa maalinta sabti 9ka bisha September si rasmi ah loo dhammeystiri doonaa xubnaha kale ee Xisbiyadda Siyasadeedka Puntland kuwaa oo codsi ay soo gudbiyeen horay ugu codsaday in wakhti dheeraad ah la siiyo. DHAMMAAD Xafiiska Warfaafinta & Wacyi-gelinta Golaha Wakiillada Dawladda Puntland

Guddoomiyaha Golaha Wakiillada DPL, Mudane Cabdirishiid Yuusuf Jibriil ayaa bulshada wakhti kula qaatay mid kamid ah makhaayadaha ku yaala badhtamaha magaalada Badhan. Sidoo kale Guddoomiyaha ayaa booqday ceel cusub oo riig ah oo qodistiisa laga wado duleedka Badhan, kaas oo marka uu hirgalo wax ka tari doona xaalada biyo ee magaalada Badhan. DHAMMAAD.

Badhan: August 30, 2023: Guddoomiyaha Golaha Wakiillada DPL Mudane Cabdirishiid Yuusuf Jibriil ayaa maanta Badhan ka daah furay dhismaha Goleyaasha Degaanka Puntland ee dhawaan la doortay, kadib munaasabad ay soo qaban qaabisay Wasaararadda Arrimaha Gudaha oo lagu dhaariyey Golaha Degaanka Badhan. Gudoomiyaha oo munaasabada soo xidhay ayaa u hambalyeeyey xubnaha Golaha Degaanka Badhan ee la doortay, iyo sidoo kale Duqa cusub ee Degmada iyo ku-xigeenkiisa oo iyagana isla goobta lagu dhaariyey. Guddoomiyaha Golaha Wakiillada ayaana mas’uuliyiinta cusub kula dardaarmay in si xilkasnimo ah ay uga shaqeeyaan horumarinta Degmadda iyo wax ka qabashada baahiyaha ka jira. Ugu dambeyn, Guddoomiyaha ayaa faray Wasiirka Arrimaha Gudaha in Magaalada Badhan lagu daro mashruuca horumarinta Degmooyinka Puntland ee JPLG, kaas oo magaaloyinka ka taageera hirgalinta Wadooyinka iyo mashaariicda kale ee Puntland ay ka fuliyaan hay’addaha caalamiga ah. DHAMMAAD.

Garoowe, Augusto 08, 2023: Guddoomiyaha Golaha Wakiillada Dawladda Puntland Mudane, Cabdirashid Yusuf Jibril Cawl oo uu wehliyo Guddoomiye ku xigeenka 2-aad Mudane, Ismaaciil Maxamed Warsame, ayaa maanta Shir-guddoomiyey fadhiga 18-aad ee Kalfadhiga 52-aad Golaha Wakiillada Dawladda Puntland. Fadhiga maanta Ajandaha ayaa ah akhriska 3-aad ee Hindse-xeereedka Maamulka Maaliyadda Guud ee Puntland oo ay soo gudbisay Wasaaradda Maaliyadda kaas oo ka kooban 70 Qodob. Ugu horeyn Guddoomiyaha Golaha Wakiillada ayaa hadalka siiyey Guddiga Maaliyadda, Dhaqaalaha & Xisaabaadka ee Golaha Wakiillada, Guddiga ayaa Golaha warbixin ka horjeediyey kadib akhriska 2aad ku sameeyn. Intaa kadibna, Goluhu ayaa guda galay qodob-qodob uga doodista & ansixinta hindise-xeereedkan oo muhiim u ah dalka. Xildhibaanada Golaha Wakiillada Dawladda Puntland, ayaa Cod aqlabiyad leh ku meelmariyeen Ansixinta Xeerka Maamulka iyo Maaliyadda Guud ee Puntland. Xeerkaan ayaa muhiimad weyn u leh nidaamka Maamulka iyo Maaliyadda Guud ee dalka. Dhinaca kalena, waxaa Golaha loo qeybiyey labada oo kala ah, Wax-ka-bedelka xeerka Goleyaashada Deegaanka Puntland iyo Wax-ka-bedelka Xeerka Maamulka Gobollada, Degmooyinka iyo dhismaha Goleyaasha deegaanka Dawladda Puntland, kuwaa oo Golaha dib loogu soo celin doono maalinta Khamiista 10 Augusto, 2023 Haddii Alle idmo. DHAMMAAD Xafiiska Warfaafinta & Wacyi-gelinta Golaha Wakiillada Dawladad Puntland.

GUDDOOMIYAHA GOLAHA WAKIILLADA DAWLADDA PUNTLAND OO MUDDEEYAY ANSIXINTA XUBNAHA GUDDIGA DOORASHADA PUNTLAND Garoowe, Augusto 03, 2023: Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibriil Cawl ayaa maanta oo taariikhdu tahay 03 August, 2023 soo saaray qoraal ku saabsan muddeynta Ansixinta Xubnaha Guddiga Doorashada Puntland Guddoomiyaha Golaha Wakiilladu: – MARKUU ARKAY: – Dastuurka Dawladda Puntland Qodobka 113-aad, farqadiisa 1-aad. MARKUU TIXGELIYAY: – Baahida loo qabo Ansxinta Xubnaha Guddiga Doorashada Puntland Guddoomiyaha Golaha Wakiillada Dawladda Puntland ayaa la socodsiinaya dhammaan Xisbiyadda Siyaasadeed ee Puntland in wakhtiga loo muddeeyey Ansixinta Xubnaha Guddiga Doorashada Puntland tahay 03-09-2023 Haddii Alle idmo. Sidaas darteed, waxaan idinka rajeynaynaa inaad Xubnaha Guddiga Doorashada Puntland u soo gudbisaan Golaha Wakiillada Dawladda Puntland ka hor taariikhda sare ku xusan si loo ansixiyo. DHAMMAAD Xafiiska Warfaafinta & Wacyi-gelinta Golaha Wakiillada Dawladda Puntland