Wararka

Garoowe, 21 April 2025: Xildhibaanno ka tirsan Golaha Wakiillada ayaa maanta ka qayb galay shirweynaha Maalgashiga Caafimaadka Puntland, kaas oo ay soo qaban qaabisay Wasaaradda Caafimaadka Puntland. Furitaanka Shirka waxaa ka soo qaybgalay Madaxweyne ku-xigeenka DPL, xubno ka tirsan Golaha Wasiiradda, qaar ka mid ah mas’uuliyiinta hay’adaha madaxa bannaan, Khuburo ka socota bahda caafimaadka, qeybo ka mid ah Maamulada Degmooyinka Puntland, Hay’adaha caalamiga ah ee taageera dhanka caafimaadka, ururada bulshada iyo marti sharaf kale. Sida ku cad qodobka 33-aad ee Dastuurka, Dowladda Puntland waxaa mas’uuliyad ka saran tahay in ay daryeesho caafimaadka guud ee dadweynaha gaar ahaan carruurta iyo haweenka, iyadoo Dastuurku uu ogolyahay furashada rugo caafimaad iyo cusbitaalo, waxaana ka kormeeraya xukuumadda, iyadoo shirkani uu ku soo beegmay xilligii loo baahnaa in dib loo eego guulaha la gaarey iyo caqabadaha jira ee ku geedaaman adeegga caafimaadka. Golaha Wakiillada waxaa shirka ku metelayey, isla markaasna qeyb ka ah Xildhibaan Cabdicasiis Axmed Saalax- Guddoomiyaha Guddiga Arrimaha Bulshada, Dhaqanka, Warfaafinta iyo Isgaarsiinta ee Golaha Wakillada, Xasan Yuusuf Majabe- Guddoomiyaha Guddiga Maaliyadda, Dhaqaalaha iyo Xisaabaadka Ee Golaha Wakillada DPL iyo Cabdirisaaq Xiddig Warsame -Xoghayaha Guud Ee Golaha Wakillada DPL, waxayna xildhibaanada oo hadal ka jeediyey kulank ay si weyn u soo dhaweeyeen shirweynaha maalgashiga Caafimaad, iyadoo xusay in ay diyaar u yihiin in ay door muhiim ah ka qaatay dhaqangelinta go’aamada ka soo baxa shirka. Golaha Wakiillada wuxuu ahmiyad gaar ah siinayaa helitaanka adeeg caafimaad oo tayo leh, isla markaasna jaban, iyagoo soo saaray xeerar lagu nidaanimayo arrimaha caafimaadka iyo dhiirigelinta maalgashiga. Dhan kale, isagoo ka duulaya cabashada dadweynaha waxaa qorshaysan in dib u habeyn lagu sameeyo xeerarka hadda jira oo qaarkood aysan la jaanqaadi Karin waqtigan, lana sameeyo xeerar cusub iyo kaabista kuwii jiray. Sidoo kale, waxaa qorshaysan in kor loo qaado qoondada miisaaniyadeed ee caafimaadka si adeegga caafimaad loo gaarsiiyo dadweynaha, xalnal loogu helo daboolidda caafimaad ee jirta. Shirka oo socon doona muddo laba beri waxay xubnaha Baarlamaanku ka qeyb gelin doonaan doodaha iyo aragti wadaagga maalgashiga Caafimaadka. -DHAMMAAD- Wixii faah-faahin ah kala xiriir: Xafiiska Warfaafinta iyo Wacyigelinta Golaha Wakiillada Dowladda.

Garowe, Abriil 13, 2025: Agaasimaha Cusub Ee Warbaahinta iyo Wacyigelinta Dadweynaha ee Golaha Wakiillada Puntland, Mudane Ibraahim Maxamuud Yuusuf Ayaa Munaasabad si heer sare ah loo agaasimay xilalka kala wareegayeen Agaasimahii hore ee Xafiiska Warfaafinta iyo Wacyigelinta Golaha Wakiillada Dowladda Puntland oo ka qabsoontay xarunta Golaha Wakiillada Puntland. Munaasabadda waxaa goobjoog ka ahaa Xoghayaha Guud ee Golaha Wakiillada Puntland, Mudane Cabdirisaaq Xidig Warsame, Hawl-wadeemnada Golaha Wakiilllada iyo marti sharaf kale. Agaasimahii hore ayaa si rasmi ah xilka ugu wareejiyay Agaasimaha cusub, Mudane Ibraahim Maxamuud Yuusuf Agaasimaha Warbaahinta iyo Wacyigelinta Dadweynaha ee Golaha Wakiillada Puntland Agaasimaha cusub ee Xafiiska Warfaafinta iyo Wacyigelinta Golaha Wakiillada, Mudane Ibraahim Maxamuud Yuusuf, ayaa isna munaasabadda ka hadlay. Wuxuu uga mahadceliyay Agaasimihii hore xilwareejinta hufan, isagoo xusay inuu halkaas ka sii wadi doono shaqada xafiiska. Sidoo kale, wuxuu u mahadceliyay Xoghayaha Guud iyo dhammaan xubnihii ka qeybgalay munaasabadda, isagoo si gaar ah ugu mahadceliyay sida diirran ee loo soo dhaweeyay.

Boosaaso, February 22, 2025 – Guddoomiyaha Golaha Wakiillada Dawladda Puntland, Mudane Hon Abdirisak Ahmed Said, ayaa maanta kulan la qaatay dhallinyarada Gobolka Bari, kaas oo looga hadlay doorka dhallinyarada ee halganka, garab istaagga Ciidanka, iyo amniga guud ee Puntland. Guddoomiyaha ayaa mid mid u dhageystay talooyinka dhallinyarada ee la xiriira amniga, doorkooda ku aaddan nabadgelyada, iyo horumarinta adeegyada bulshada, gaar ahaan caafimaadka, ciyaaraha, farsamada gacanta, iyo shaqo abuurka dhallinyarada Gobolka Bari. “Dhallinyaradu waa laf-dhabarta Puntland, waana hoggaamiyeyaasha maanta. Waa in la xoojiyo kaalintooda, loo abuuro fursado shaqo iyo horumarin, si ay gacan uga geystaan dhismaha Dowladnimo, nabadda, iyo amniga Puntland.” Ayuu yiri Guddoomiyaha Golaha Wakiillada Dawladda Puntland Mudane Cabdrisaaq Axmed Siciid. Guddoomiyaha ayaa hoosta ka xarriiqay muhiimadda ay leedahay in dhallinyaradu door weyn ka qaataan sugidda amniga, la dagaallanka xagjirnimada, iyo xoojinta wadajirka bulshada. Wuxuu ballan qaaday in talooyinkooda la tixgelin doono, lana xoojin doono dadaallada lagu horumarinayo adeegyada bulshada iyo amniga. – DHAMMAAD – Xafiiska Warfaafinta & Wacyi-gelinta Golaha Wakiillada Dowladda Puntland.

Fadhigan ayaa si qoto dheer looga wada hadlay qodobo dhowr ah; Garowe, Nofeembar 27, 2024: Guddoomiyaha Golaha Wakiillada Dowladda Puntland, Mudane Hon Abdirisak Ahmed Said, oo uu wehliyo Guddoomiye Ku-xigeenka 2-aad, Mudane Hon Mohamed Mahamud Esse ayaa shir-guddoomiyey fadhiga 20-aad, Kalfadhiga 55-aad ee Golaha Wakiillada. Fadhigan ayaa si qoto dheer looga wada hadlay qodobo dhowr ah; Guddoomiyaha Golaha Wakiillada ayaa Golaha la wadaagay ajandaha fadhiga maanta, waxa uuna ugu horayn u yeeray Guddiga Anshaxa iyo Arrimaha Golaha si ay u soo jeediyaan buuxinta kursiga bannaan ee Golaha. Intaa kadib, Guddoomiyaha Guddiga Anshaxa iyo Arrimaha Golaha, Mudane Maxamed Siciid Qoslaaye, ayaa soo jeediyay in Liibaan Bedel Shiikh Maxamuud uu si rasmi ah uga mid noqday Golaha Wakiillada Dawladda Puntland, kadib markii uu buuxiyay dhammaan shuruudaha. Guddiga Anshaxa iyo Arrimaha Golaha Wakiillada ayaa soo jeediyay in la buuxiyo kursi bannaan oo ka mid ah xubnaha golaha. Dhaariinta iyo aqoonsiga Liibaan Bedel Shiikh Maxamuud. Sidoo kale, fadhiga ayaa lagu ansixiyey xasaanadda Wasiiru Dowlaha Wasaaradda Qorsheynta, Horumarinta Dhaqaalaha iyo Iskaashiga Caalamiga ah ee Dawladda Puntland, Mudane Faarax Aw Cismaan. Xasaanaddan ayaa si rasmi ah u aqoonsanaysa xilka Wasiiru Dowlaha, taasoo ka dhigan in Mudane Faarax uu si hufan uga hawlgali doono Qorsheynta, Horumarinta Dhaqaalaha iyo Iskaashiga Caalamiga ah ee Dawladda Puntland, taasoo qayb ka ah dadaallada Dawladda ee horumarinta dhaqaalaha iyo siyaasadda gobolka. Dhinaca kale, Golaha Wakiillada ayaa xubnaha golaha u qeybiyey qabyo-qoraalka Miisaaniyadda Dawladda Puntland ee sannadka 2025, taasoo maanta ay soo gudbiyeen Wasaaradda Maaliyadda, waxaana lagu wareejiyey Guddiga Maaliyadda, Dhaqaalaha & Xisaabaadka Golaha Wakiilladda Dawladda Puntland. Intaa waxaa dheer, Guddoomiyaha Golaha Wakiillada Mudane, Cabdirisaaq Axmed Siciid ayaa magacaabay labo guddi kuwaas oo kala ah; Guddiga soo ururinta xogta gobollada, kuwaas oo loo xil-saaray ururinta iyo falanqaynta xogta ku saabsan xaaladaha gobollada Puntland, taasoo gacan ka geysan doonta qorsheynta horumarineed ee deegaanada kala duwan. Sidoo kale, Guddiga la xisaabtanka Golaha Xukummadda iyo xogta arrimaha garsoorka ayaa loo magacaabay si loo xoojiyo isla xisaabtanka iyo hufnaanta maamulka dowladda, iyagoo ka shaqeyn doona hubinta in maamulka Puntland uu u shaqeeyo si cadaalad ah oo hufan. Golaha Wakiillada Dawladda Puntland wuxuu sii wadi doonaa dadaalladiisa ku aaddan hirgelinta mashaariicda iyo siyaasadaha muhiimka ah ee dalka, isagoo ka shaqeynaya sidii loo abuuri lahaa horumar waara oo ka tarjumaya baahiyaha shacabka Puntland iyo guud ahaan Soomaaliya. DHAMMAAD Xafiiska Warfaafinta iyo Wacyi-gelinta Golaha Wakiillada Dowladda Puntland

  ·  Garoowe, Nofeembar 10, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo ay weheliyaan Guddomiye Ku-xigeenka 1aad Mudane Maxamed Baarri Shire iyo Guddomiye Ku-xigeenka 2aad Mudane Maxamed Maxamuud Ciise, ayaa maanta shir guddoomiyey fadhiga 9-aad ee Kalfadhiga 55-aad ee Golaha Wakiillada Puntland. Ajendaha kulankan ayaa ahaa ka doodista iyo ansixinta Wax-ka-beddelka Xeerka Qareennada Puntland, oo ay Guddiga Shuruucda, Caddaaladda, Arrimaha Diinta & Dastuurka ee Golaha Wakiillada ku sameeyeen isbeddel & kaabis. Guddigu waxa uu maanta Golaha la wadaagay warbixin faahfaahsan oo ku saabsan wax-ka-beddelka iyo kaabista lagu sameeyay xeerka, si loo turxaan bixiyo una waafajiyo Dastuurka iyo sharciyada Puntland. Fadhiga maanta oo xildhibaannadu ku lafagureen xeerka, ayaa waxa si gaar ah loogu falanqeeyey qodobada muhiimka ah ee wax laga beddelay iyo kuwa cusub ee lagu soo kordhiyey xeerka. Guddigu, isaga oo ku salaynaya Qodobka 58.5-aad ee xeer-hoosaadka Golaha Wakiillada iyo Qodobka 64.1-aad ee Dastuurka Dawladda Puntland, ayaa dib u eegis iyo kaabis ku sameeyey xeerkan, ka dibna wuxuu soo gudbiyey akhrinta saddexaad ee fadhigan. Guddiga ayaa intii uu diyaarinayey soo jeedinta, talo iyo tusaale ka helay Wasaaradda Cadaaladda, Dastuurka, Arrimaha Diinta iyo Dhaqancelinta Dawladda Puntland, Ururka Qareennada, iyo hay’ado kale oo muhiim ah oo ay khusayso arrimaha sharci. Sidoo kale, waxaa la barbar dhigay xeerarka dalalka dariska ah si loo hubiyo waafaqsanaanta iyo tayada xeerka. Guddoomiyaha Guddiga ayaa caddeeyey in dood iyo falanqayn dheer ka dib la sameeyey wax-ka-beddel iyo kaabis ay ku jiraan: 14 qodob oo la tiray ama laga saaray xeerka. 4 qodob oo cusub oo lagu soo kordhiyey. 28 qodob oo wax-ka-beddel iyo kaabis lagu sameeyey. Xildhibaanada Golaha Wakiillada ayaa ka dooday isbeddelada lagu sameeyey xeerka, iyagoo tilmaamay muhiimadda ay leedahay in la horumariyo nidaamka caddaaladda Puntland, si loo helo nidaam sharci oo la isku halleyn karo. Xeerka Qareennada Puntland oo ah xeer muhiim u ah shaqada qareennada, ayaa loogu talagalay in uu xoojiyo ku dhaqanka sharciga iyo ilaalinta xuquuqda dadka, isagoo siinaya qareennada awood ay si madaxbannaan ugu shaqeeyaan. Dooda la xiriirta Wax-ka-bedelka Xeerka Qareennada Puntland ayaa sii socon doonta maalmaha soo socda Haddii Alle idmo. – DHAMMAAD – Xafiiska Warfaafinta iyo Wacyi-gelinta, Golaha Wakiillada Dawladda Puntland

Garoowe, Nofeembar 6, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo ay weheliyaan Guddomiye Ku-xigeenka 1aad Mudane Maxamed Baarri Shire iyo Guddomiye Ku-xigeenka 2aad Mudane Maxamed Maxamuud Ciise, ayaa maanta shir guddoomiyey fadhiga 8-aad ee Kalfadhiga 55-aad ee Golaha Wakiillada Puntland. Ajandaha fadhiga ayaa ahaa qeybinta Wax-ka-baddelka Xeerka Qareennada Puntland oo guddiga shuruucda, Caddaaladda, Arrimaha Diinta iyo Dastuurka ee Golaha Wakiilladu ay gacanta ku hayeen islamarkaana akhrinta la baad ku sameeyeen,iyagoo latashi Kala sameeyey daneeyayaasha kala duwan ee xeeerku khuseeyo. Xeerka Qareennada ayaa loogu talagalay inuu nidaamiyo shaqada qareennada Puntland, isagoo dejinaya hage iyo sharciyo cad oo u suurta galinaya qareennada inay si madaxbannaan uga shaqeeyaan difaaca xuquuqda dadweynaha. Sidoo kale, xeerkan ayaa looga gol leeyahay xoojinta ku dhaqanka sharciga, ilaalinta caddaaladda, iyo kor u qaadista kalsoonida dadweynaha ee nidaamka caddaaladeed ee Puntland. Xeerkan wuxuu awood siinayaa qareennada Puntland inay difaacaan xuquuqda dadka iyada oo aan cabsi laga qabin in shaqadooda lagu farageliyo. Golaha Wakiillada Puntland ayaa si wadajir ah u soo dhaweeyey wax-ka-baddelka xeerka, iyagoo sheegay in uu muhiim u yahay horumarinta nidaamka caddaaladda. Xubnaha golaha ayaa isku raacay in xeerkan uu horseedi doono nidaam caddaaladeed oo hufan, isla markaana ay Puntland ka hirgeliso nidaam sharci oo ku dhisan cadaalad iyo sinaan. Goluhu wuxuu qorsheynayaa in fadhiyada dambe la sii ambaqaado doodaha la xiriira xeerkan, si loo dhammeystiro isla markaana loo ansixiyo si buuxda. – DHAMMAAD –

Garoowe, Nofeembar 3, 2024 – Guddoomiyaha Golaha Wakiillada Dawladda Puntland, Mudane Cabdirisaaq Axmed Siciid, oo uu wehliyo Guddoomiye Ku-xigeenka 1-aad, Mudane Maxamed Baarri Shire, iyo Guddoomiye Ku-xigeenka 2-aad, Mudane Maxamed Maxamuud Ciise, ayaa maanta shir-guddoomiyey fadhiga 5-aad ee Kalfadhiga 55-aad ee Golaha Wakiillada Dawladda Puntland. Fadhiga waxaa ka soo qaybgalay 50 mudane, waxaana diiradda lagu saaray dhageysiga warbixinno ay soo jeediyeen 5 ka mid ah guddiyada Golaha Wakiillada kuwaas oo dhawaan kormeerro ku sameeyey hay’adaha Dawladda iyo gobollada dalka. Guddiyadan oo warbixinnadooda si faahfaahsan ugu soo bandhigay waxqabadkooda iyo hawlaha ay qabteen ayaa kala ah: 1. Guddiga Arrimaha Deegaanka & Kheyraadka Dabiiciga ah – Warbixinta guddigan waxay diiradda saartay kormeerka hay’adaha Dawladda ee wada shaqeynta la leh iyo safaradii ay ku tageen gobollada dalka, iyagoo ku dhaqmay qodobada 64-aad (farqadiisa 6-aad), 62.9-aad, iyo 68-aad ee Xeer-hoosaadka Golaha Wakiillada intii u dhexeysay kalfadhiyada 54-aad iyo 55-aad. 2. Guddiga Siyaasadda, Qorsheynta, Horumarinta Dhaqaalaha & Xiriirka Caalamiga ah – Guddigan wuxuu soo bandhigay warbixin ka hadlaysa kormeerkii hay’adaha Dawladda ee wada shaqeynta la leh iyo safaradii ay ku tageen gobollada, iyagoo raacaya qodobka 64-aad ee Dastuurka Puntland, iyo qodobada 62.2-aad iyo 68-aad ee Xeer-hoosaadka Golaha Wakiillada. 3. Guddiga Arrimaha Bulshada, Dhaqanka, Warfaafinta iyo Isgaarsiinta – Warbixinta guddigan waxay ku salaysnayd kormeerkii hay’adaha Dawladda ee wada shaqeynta la leh iyo safaradii gobollada, sida uu dhigayo qodobka 64-aad (farqadiisa 6-aad) ee Dastuurka Puntland iyo qodobada 42.8-aad iyo 62.8-aad ee Xeer-hoosaadka Golaha intii u dhexeysay kalfadhiyada 54-aad iyo 55-aad. 4. Guddiga Amniga iyo Nabadgelyadda – Guddigani wuxuu ku soo bandhigay warbixin amniga iyo nabadgelyada, isagoo ku salaynaya shaqadii uu qabtay iyo kormeeradii uu sameeyey si loo xoojiyo xasiloonida guud ee Puntland. 5. Guddiga Maaliyadda, Dhaqaalaha iyo Xisaabadka – Guddiga wuxuu soo gudbiyay warbixin ku saabsan hawlgallada la xiriira kormeerka maaliyadda iyo dhaqaalaha hay’adaha Dawladda iyo gobollada, isagoo ku dhaqmaya qodobada 63-aad, 64-aad ee Dastuurka Puntland, iyo qodobada 42.8-aad iyo 62.8-aad ee Xeer-hoosaadka Golaha intii u dhexeysay labada kalfadhi. DHAMMAAD Xafiiska Warfaafinta iyo Wacyi-gelinta Golaha Wakiillada Dowladda Puntland