Wararka

Galkacyo, 7 Febraayo 2026 – Guddiga Gaarka ah ee uu Golaha Wakiilladu u xilsaaray soo ururinta iyo diiwaangelinta xogta dadka baahiyaha gaarka ah qaba ayaa safar shaqo ku tegey Magaalada Galkacyo, xarunta Gobolka Mudug. Guddiga ayaa maanta kormeer shaqo ku sameeyey Xarunta Naafada, Xarunta Agoomaha, iyo Xarunta Dhimirka Haweenka ee magaalada Galkacyo. Kormeerka ayaa diiradda lagu saaray sidii loo heli lahaa xog dhammeystiran oo ka tarjumaysa xaaladda dhabta ah ee dadka baahiyaha gaarka ah qaba, caqabadaha jira, iyo adeegyada kala duwan ee xarumahan ay u fidiyaan bulshada baahiyaha gaarka ah qaba. Xubnaha Guddiga ayaa carrabka ku adkeeyey in helitaanka xog sax ah oo la isku halayn karo ay tahay tiir-dhexaadka diyaarinidda talooyin iyo go’aanno wax ku ool ah oo mustaqbalka loo gudbin doono Golaha Wakiillada, si loo horumariyo loona xoojiyo adeegyada loo fidiyo dadka baahiyaha gaarka ah qaba. DHAMMAAD

Garoowe, Feb 2, 2026: Guddoomiyaha Golaha Wakiillada Dawladda Puntland Mudane, Hon Abdirisak Ahmed Said oo uu weheliyo Guddoomiye ku-xigeenka 2-aad Mudane, Hon Mohamed Mahamud Esse ayaa shir-guddoomiyey fadhiga 4-aad ee Guddiga Joogtada ah. Fadhiga maanta waxaa looga hadlay xaaladda guud ee Puntland, waxaana warbixinno laga dhegeystay Madax-Guddiyeedyada guddiyada Golaha, taasoo ku saabsanayd arrimaha Amniga, siyaasadda, xaaladda abaaraha ee ka jirta deegaannada Puntland iyo isku dayga sharcidarra ah ee wax-ka-baddelka Dastuurka Ku meel gaarka ah ee Federaalka Soomaaliya. Sidoo kale waxaa warbixin looga dhegeystey guddiyo gaar ah ee Guddiga Joogtada ah u xilsaaray shaqooyinka kala duwan. Warbixinnada guddiyadda kadib, Guddiga Joogtada ah waxay isla qaateen Qodobadan soo socda: 1. In guddiyada gaarka ah ee golahu u xilsaaray shaqooyinka kala duwan ay warbixinnadooda oo dhammaystiran ku soo gudbiyaan fadhiga dambe. 2. In warqad talo-soo-jeedin ah lala wadaago Xukuumadda Puntland, taasoo taabanaysa Amniga gudaha Puntland,Tayeynta hay’adaha dawladda, Arrimaha Garsoorka iyo Caddaaladda, Gurmadka abaaraha, Hannaanka xisbiyada badan, Iyo arrimaha Federaalka Soomaaliya 3. Guddigu wuxuu isla qaatay in Golaha Wakiilladu door muuqda ka qaato gurmadka abaaraha, iyadoo guddiga gaarka ah ee arrimaha abaaruhu si joogto ah ula soconayo xaaladda abaaraha, abaabulka gurmadka, iyo ka jawaabista saamaynta ay abaaruhu ku yeesheen bulshada. 4. Guddiga joogtada ah wuxuu cambaaraynaya isku day kasta oo wax-ka-beddelka sharci-darradda ah lagu sameeyo ee Dastuurka KMG ah, kaasoo aan marna loo marin hannaanka sharci dejineedkii uu Dastuurku sheegayo, islamarkaana aan laga qayb gelin shacabka iyo golayaasha dowladda Puntland, sida ku cad Qodobada 132 iyo 137 ee Dastuurka KMG ah ee Soomaaliya. 5. Annagoo wakiil ka ah shacabka Puntland waxaan caddaynaynaa in natiijo kasta oo ka soo baxda wax-ka-beddel lagu sameeyo Dastuurka KMG ee 2012, iyadoo aan Hay’adaha Puntland si buuxda uga qayb-qaadan si waafaqan Qodobka 4-aad ee Dastuurka Puntland, ay tahay mid waxba kama jiraan ah laguna dhaqikarin Puntland, islamarkaana aan yeelanayn samayn sharciyeed. 6. Waxaan bogaadinaynaa xildhibaannada Baarlamaanka Federaalka ah ee ka horyimid isku dayga wax-ka-beddelka sharci-darrada ah ee Dastuurka KMG ah, kuwaasoo la kulmay caadaadis Amni iyo ka hor-istaag shaqadoodii Dastuuriga ahayd, taasoo muujinaysa khatarta ay ku jiraan hay’adihii Dawladda Federalka Soomaliyeed 7. Ugu dambayn, waxaan ugu baaqaynaa dhammaan shacabka Soomaaliyeed inay ka shaqeeyaan midnimada, wadajirka, iyo badbaadinta dalka, gaar ahaan ilaalinta Dastuurka heshiiska lagu yahay ee la ansixiyay sannadkii 2012. DHAMMAAD

Qardho : 01 February 2026 : Guddoomiye Ku-xigeenka 1-aad ee Golaha Wakiillada Hon Mohamed Baarri Shire Ayaa Madaxweynaha Dowladda Puntland Mudane Siciid Cabdullaahi Deni,kala qayb galay kulan ku saabsan boggaadinta doorkii bulshada ee Hawlgalka Calmiskaad oo maraya meel gebogebo ah. Kulanka waxaa ka qeybgalay Xildhibaanada Golaha ,Saraakiisha Hawlgalka Calmiskaad, Goleyaasha Dowladda , Maamulka Gobolka Karkaar iyo kan degmada Qardho iyo qeybaha kala duwan ee bulshada . Intuu Kulanku socday waxaa uu Madaxweynuhu shahaadooyin guddoonsiiyey 17 sarkaal oo ku takhasusay ka hortagga walxaha qarxa, kuwaasi oo tababar ku dhammeystay kulliyada tababarka ee degmada Carmo. DHAMMAAD

Garowe, 1 Febraayo 2026 – Guddiga Gaarka ah ee uu Golaha Wakiilladu u xilsaaray soo ururinta iyo diiwaangelinta xogta dadka baahiyaha gaarka ah qaba ayaa maanta sii waday hawlahooda shaqo. Guddigu waxa uu kulan wadatashi ah la yeeshay Wasiirka Wasaaradda Caafimaadka iyo Masuuliyiinta Xarunta Dhagoolayaasha. Kulanka ayaa diiradda lagu saaray sidii loo heli lahaa xog dhammeystiran oo ka tarjumaysa xaaladda dhabta ah ee dadka baahiyaha gaarka ah qaba, caqabadaha jira, iyo qorshayaasha Wasaaradda Caafimaadku uga degsan yihiin wax ka qabashadooda. Xubnaha guddiga ayaa carrabka ku adkeeyay in helitaanka xog sax ah oo la isku halayn karo ay tahay tiir-dhexaadka diyaarinta talooyin iyo go’aanno wax ku ool ah oo mustaqbalka lagu horgeyn doono Golaha Wakiillada, si loo horumariyo adeegyada loo fidiyo dadka baahiyaha gaarka ah qaba. DHAMMAAD

Garowe, 29 Janaayo 2026- Guddiga Amniga iyo Nabadgelyada ee Golaha Wakiilada Dowladda Puntland ayaa maanta booqasho shaqo ku tegey Xarunta Taliska Booliska Puntland. Booqashadan ayaa qeyb ka ahayd kormeerka shaqo ee guddigu ku qiimeynayo xaaladda amniga iyo howlaha kala duwan ee hay’adaha amniga Puntland. Guddiga ayaa kulan la qaatay Taliyaha Ciidanka Booliska Puntland, kaas oo ay uga dhageysteen warbixin faahfaahsan oo ku saabsan xaaladda guud ee amniga, caqabadaha jira, iyo qorshayaasha horumarineed ee ciidanka Booliska. Ugu dambeyn, Guddiga Amniga iyo Nabadgelyada ayaa bogaadiyey dadaalka ay ciidanka Boolisku ku bixiyaan ilaalinta amniga, iyaga oo ballanqaaday inay taageero sharci iyo mid talo-ba la garab istaagi doonaan hay’adaha amniga Puntland. DHAMMAAD

Garowe, 28 Janaayo 2026- Guddiga Gaarka ah ee uu Goluhu u xilsaaray soo aruurinta xogta dadka baahiyaha gaarka ah qaba oo sii wada shaqadoodi ayaa maanta kulan la qaatay Wasaaradda Qorshayanta, Horumarinta Dhaqaalaha iyo Xiriirka Caalamiga ah. Guddigi wuxuu Wasaaradda wax ka waydiiyey qorshaha uga yaal horumarinta dhaqan-dhaqaale ee dadka baahiyaha gaarka ah qaba iyo arrimaha kale ee la xiriira shaqada Wasaaradda ee khuseeya dadka baahiyaha gaarka ah qaba. Guddigu ayaa u kuurgal Si ay wax uga ogaadaan Qorshayaasha uga digsan dadka baahiyaha gaarka qaba Si ay uga mid noqdaan Qorshayaasha soo socda ee Wasaaraddu dejiso. Guddigu waxa ay xuseen in xogtan ay muhiim u tahay diyaarinta talooyin iyo go’aanno wax ku ool ah oo Golaha lagu horgeyn doono. DHAMMAAD

Boosasso, 26 Janaayo 2026- Gudoomiye ku xigeenka 1-aad ee Golaha Wakiilada Dowladda Puntland, Hon Mohamed Baarri Shire, ayaa caawa ka qeybgalay xuska Maalinta Furdooyinka Caalamiga ah, munaasabad oo ay soo agaasintay Wasaarada Maaliyada Puntland oo lagu xusayay doorka ay leeyihiin furdooyinka caalamka. Munaasabadda oo ay ka soo qeyb galeen masuuliyiin ka tirsan Dowladda Puntland, ururrada bulshada rayidka ah iyo qeybaha kala duwan ee bulshada, ayaa diiradda lagu saaray wacyigelinta furdooyinka, caqabadaha haysta iyo sidii loo xoojin lahaa. Gudoomiye ku xigeenka 1-aad ee Golaha Wakiilada, Mudane Maxamed Baarri, oo munaasabadda ka jeediyay hadal, ayaa Hambalyo u diray dhamaan howl wadeenada furdooyinka Dowladda Puntland. DHAMMAAD

Garoowe, January 26, 2026: Guddoomiyaha Golaha Wakiillada Dawladda Puntland Hon Abdirisak Ahmed Said oo uu weheliyo Guddoomiye ku-xigeenka 2-aad Hon Mohamed Mahamud Esse ayaa shir-guddoomiyey fadhiga 3-aad ee Guddiga Joogtada ah. Fadhiga maanta waxaa looga hadlay xaaladda guud ee dalka, waxaana warbixinno laga dhegeystay Madax-Guddiyeedyada guddiyada Golaha, taasoo ku saabsanayd arrimaha Amniga, siyaasadda, dhaqaalaha, deegaanka, iyo xaaladda abaaraha ee ka jirta Puntland. Intii kulanku socday, Guddiga Gaarka ah ee Guddiga Joogtada ah ee Golaha Wakiilladu u xilsaaray u kuurgelidda iyo ka jawaabidda cabashada nootaayooyinka bulshada Puntland ayaa Guddiga la wadaagay warbixin la xiriirta kulankii ay la yeesheen Guddiga Nootaayooyinka iyo madaxda wasaaradda caddaaladda Puntland. Warbixintaas ayaa diiradda lagu saaray shaqooyinkii la qabtay, caqabadaha jira iyo cabashooyinka ka jira arrimaha nootaayooyinka bulshada, markii guddigu dhegaystay warbixintaas waxaa dood dheer kadib guddigii gaarka ahaa dib loogu celiyey inay soo dhammaystiraan xogaha la xiriira arrimahaas, si loo waafajiyo xeerarka iyo nidaamka dawliga ah. Dhinaca kale, waxaa warbixin looga dhegeystey guddiga gaarka ah ee Goluhu u xilsaaray soo ururinta xogta dadka baahiyaha gaarka ah qaba. Guddigaas oo booqasho iyo kormeer ku tagey dalladda Ururrada Naafada Puntland, Wasaaradda Horumarinta Haweenka iyo Arrimaha Qoyska iyo Wasaaradda Waxbarashada iyo Tacliinta Sare, waxayna warbixinno ka dhegeysteen mas’uuliyiinta hay’adahaas, si loogu qareemo dadka baahiyaha gaarka ah qaba. Guddiga Joogtada ah ayaa dood ka yeeshay xaaladda Amniga Guud ee Puntland iyo qorshaha dib u habaynta Ciidanka,Guddigu wuxuu u xilsaaray guddi gaar ah oo talooyin iyo qorsheeyaal ka soo jeedinayaa arrimaha ciidamada qalabkasida. Ugu dambayntii Guddiga Joogtada waxaa cabasho u soo gudbiyey qaar kamid ah Goleyaasha Daagaanka degmooyinka Puntland. Dood iyo falanqeyn kadib Guddiga Joogtada waxay u xilsaareen cabashada Goleyaasha deegaanka Guddiga Arrimaha Gudaha, Federaalka iyo Dimuqraadiyadda Golaha Wakiilladu in ay kala fariistaan Wasaaradda Arrimaha Gudaha, Federaalka iyo Dimuqraadiyeynta si xal loogu helo cabashooyinka ka soo noq-noqday Goleyaasha deegaanka Puntland. DHAMMAAD

Garowe, 25 Janaayo 2026- Guddiga Gaarka ah ee uu Goluhu u xilsaaray soo aruurinta xogta dadka baahiyaha gaarka ah qaba ayaa maanta kormeer shaqo ku tagay Wasaaradda Waxbarashada iyo Tacliinta Sare ee Dowladda Puntland. Guddigu waxa ay kulan la yeesheen Masuuliyiinta Wasaaradda Waxbarashada, iyaga oo ka waraystay adeegyada iyo barnaamijyada ay Wasaaraddu u fidiso dadka baahiyaha gaarka ah qaba, agoomaha iyo dadka garaad-dhimanka ah. Kulanka ayaa diiradda lagu saaray helitaanka xog dhammaystiran oo la xiriirta taageerada waxbarasho, caqabadaha jira, iyo qorshayaasha mustaqbalka ee Wasaaraddu ku horumarinayso adeegyada gaarka ah. Guddigu waxa ay xuseen in xogtan ay muhiim u tahay diyaarinta talooyin iyo go’aanno wax ku ool ah oo Golaha lagu horgeyn doono. DHAMMAAD