Wararka

Qoton– 22 May, 2026:— Guddiga Golaha Wakiillada Dowladda Puntland ee kormeerka shaqo ku jooga Gobolka Karkaar ayaa maanta kormeer shaqo ku tegay Deegaanka Qoton oo ka tirsan Degmada Bayla Gobolka Karkaar. Xildhibaannada ayaa si gaar ah uga xog wareystay Odoyaasha iyo Maamulka Deegaanka adeegyada Biyaha, Caafimaadka, Waxbarashada iyo Amniga. Dhanka kale, Xildhibaannada ayaa sheegay in warbixinta kormeerkooda ay horgeyn doonaan fadhiga guud ee Golaha Wakiillada, iyadoo socdaalkani uu qayb ka yahay kormeerada Guddiyada ee la socoshada shaqooyinka ka socda degmooyinka iyo baahiyaha jira. DHAMMAAD

Jariiban – 21 May, 2025:— Guddiga Golaha Wakiillada Dowladda Puntland ee kormeerka shaqo ku jooga Gobolka Mudug ayaa kulan muhiim ah la yeeshay bulshada rayidka ah ee Degmada Jariiban. Kulankan oo ka dhacay magaalada Jariiban waxaa ka qaybgalay Guddoomiyaha Degmada, Taliye Ku-xigeenka Qaybta gobolka Mudug, iyo qaybaha kala duwan ee bulshada. Intii uu socday kulanka, bulshada rayidka ah waxay fursad u heleen in ay su’aalo toos ah weydiiyaan xildhibaannada, kuwaas oo si hufan uga jawaabay su’aalihii iyo tabashooyinkii lasoo jeediyay. Kulankan wuxuu qeyb ka yahay dadaallada Golaha Wakiillada Puntland ee lagu xoojinayo isla-xisaabtanka, is-dhexgalka shacabka iyo wakiilladooda, iyo weliba in la helo aragtiyo iyo talooyin toos ah oo ka imaanaya shacabka – kuwaas oo wax ka tari kara hawlaha sharci-dejinta iyo waajibaadka kale ee Golaha. DHAMMAAD –

Garacad – 21 May, 2026:— Xildhibaanno ka tirsan Golaha Wakiillada Dowladda Puntland ee kormeerka shaqo ku jooga Gobolka Mudug ayaa caawa kulan la qaatay maamulka iyo waxgaradka deegaanka Garacad ee Degmada Jariiban, iyagoo ka dhagaystay warbixino ku saabsan xaaladda adeegyada caafimaadka, waxbarashada, amniga iyo cadaaladda. Kulankan ayaa qeyb ka ah kormeerka iyo u kuurgalka ay Golaha Wakiilladu ku sameynayaan adeegyada bulshada iyo baahiyaha ka jira deegaannada Gobolka Mudug. DHAMMAAD

Boosaso,3 May 2026- Guddoomiye ku-xigeenka 1-aad ee Golaha Wakiillada Dowladda Puntland Hon Mohamed Baarri Shire, ayaa Madaxweynaha Dowladda Puntland kala qayb galay munaasabadda xarig-jarka Garoonka Shuhadada ee magaalada Boosaaso. Munaasabadda ayaa waxaa ka soo qayb galay qaar ka mid ah Xildhibaanada Golaha Wakiillada, xubno ka tirsan Golaha Xukuumadda, Maamulka Degmada Boosaaso, maamullada degmooyinka ka qayb galaya Koobka Calmiskaad, iyo qaybaha kala duwan ee bulshada ku dhaqan magaalada Boosaaso. Munaasabaddan xarig-jarka ah ayaa muujinaysa horumarka ka socda dhinaca kaabeyaasha ciyaaraha, iyadoo Garoonka Shuhadada uu door muhiim ah ka qaadan doono kobcinta isboortiga iyo dhiirrigelinta dhalinyarada gobolka. DHAMMAAD

Carmo, 30 April 2026- Guddoomiye ku-xigeenka 1aad ee Golaha Wakiillada Dowladda Puntland, Mudane Maxamed Barri Shire, ayaa ka qayb galay munaasabadda dhaarinta ciidanka cusub ee Booliska Birmadka Puntland. Guddoomiye ku-xigeenka ayaa waxaa ku weheliyey Taliyaha Booliska Dowladda Puntland ,maamulka degmada iyo saraakiil kale oo ka tirsan laamaha amniga. Munaasabaddan ayaa muujinaysa dadaalka Dowladda Puntland ee ku aaddan xoojinta amniga, horumarinta tayada ciidamada, iyo sugidda nabadgelyada guud ee shacabka. Mas’uuliyiinta ayaa dhiirrigelin u jeediyay ciidanka cusub, iyagoo ku booriyay inay si daacadnimo, karti iyo waddaniyad leh ugu adeegaan dalka iyo dadka. DHAMMAAD

Garowe, 20 April 2026- Guddoomiye ku-xigeenka 1-aad Hon Mohamed Baarri Shire iyo Guddoomiye ku-xigeenka 2-aad Hon Mohamed Mahamud Esse ee Golaha Wakiillada Dowladda Puntland ayaa ka qayb galay munaasabadda dhaarinta Maxkamadda Sare iyo Maxkamadda Darajada 1-aad ee Ciidamada Qalabka Sida iyo Dambiyada Culus, taas oo uu goob joog ka ahaa Madaxweynaha Dowladda Puntland, Mudane Siciid Cabdullaahi Deni. Munaasabadda ayaa waxaa sidoo kale ka soo qayb galay Guddoomiyaha Guddiga Shuruucda, Caddaaladda, Arrimaha Diinta iyo Dastuurka, Guddoomiyaha Guddiga Amniga iyo Nabadgelyada Ee Golaha Wakiillada Dowladda Puntland, xubno ka tirsan Golaha Xukuumadda, masuuliyiinta Maxkamadda Sare, Taliyeyaasha Ciidamada Booliiska iyo Asluubta, la-taliyeyaasha Madaxweynaha, Agaasimaha Guud iyo Agaasime Ku-xigeenka Madaxtooyada, iyo saraakiil kale oo ka tirsan Madaxtooyada. DHAMMAAD

Garoowe, April 13, 2026: Guddoomiye ku xigeenka 1-aad ee Golaha Wakiillada Dowladda Puntland Hon Mohamed Baarri Shire, ayaa shir-guddoomiyey fadhiga 8-aad ee Guddiga Joogtada ah. Fadhiga maanta waxaa diiradda lagu saaray xaaladda guud ee Puntland, iyadoo warbixinno laga dhegeystey madax-guddiyeedyada kala duwan. Warbixintaas oo la xiriirtey Amniga Guud ee Puntland, Arrimaha bulshada, siyaasadda, Kaabayaasha dhaqaalaha iyo warbixin la xiriirta roobabka gu’ga ee ka da’aday deegaannada Puntland. Intii fadhiga lagu guda jirey waxaa warbixin dhammaystirin Guddiga ka siiyey Guddoomiye Maxamed Baari Shire, guusha laga gaarey ee aaddan la dagaalanka Aragagixisada Daacish ee dhuumaalaysata Buuraha Calmiskaat iyo dedaalka iyo qorsheyaasha ay waddo dawladdu sidii loo soo afjarilahaa. Guddiga Joogtada ah ayaa kula dardaarmay bulshada Deegaanka in ay meel uga soo wada jeestaan dhammaystirka soo afjaridda Kooxda Daacish. Fadhiga maanta ayaa Guddiga Joogtada ah loo qeybiyey xeerarka uu Goluhu ku ansixiyey kalfadhigii 57-aad ee Golaha wakiillada, Madaxweynuhuna saxiixay, Faafinta rasmiga ahna lagu soo saaray, si guddiyadu ay dabagal ugu sameeyaan dhaqangalkooda. Dhinaca kale, si waafaqsan Xeerka Maamulka Maaliyadda Guud ee Puntland Guddiga Joogtada ah ayaa ansixiyey kororka misaaniyadda 2026 mashruuca ay fulinayo Hay’adda badbaadada Carruurta ee Save the Children oo kaashanaysa sanduuqa gaar-gaarka banii’aadantinimada Soomaaliyeed ee SOM-HF, kaasoo ka mid ah mashaariicda taageera horumarinta adeegga caafimaadka Puntland, koror kaasoo ay Wasaaradda Maaliyaddu u soo gudbisay Golaha Wakiillada, lana soo marinayo khasnadda mideysan ee dawladda Puntland,si loo xoojiyo nidaamka maareynta maaliyadda dadweynaha loona hagaajiyo hufnaanta, la xisaabtanka iyo nidaamka dawladnimada. Ugu dambayntii, guddiga Joogtada ah waxay isla qataay in la dar-dargeliyo qorsheyaasha iyo shaqooyinka ay guddiyadu gacanta ku hayaan. DHAMMAAD Wixii faahfaahin ah kala xiriir: Xafiiska Warfaafinta iyo Wacyigelinta

Qardho, 9 April 2026- Guddoomiye ku-xigeenka 1-aad ee Golaha Wakiillada Dowladda Puntland Hon Mohamed Baarri Shire, ayaa Madaxweynaha Dowladda Puntland, Mudane Siciid Cabdullaahi Deni, kala qayb galay munaasabad tababar loogu furayay cutubyo ka tirsan Ciidanka Daraawiishta Dowladda Puntland, gaar ahaan guutada saddexaad ee ka hawlgalaysa buuraleyda Calmiskaad. Guddoomiye ku-xigeenka 1-aad ee Golaha Wakiillada Dowladda Puntland ayaa door muuqda ka qaatay arrimaha ciidamada, isaga oo lagu xasuusto kaalintii firfircoonayd ee uu ka qaatay howlgalkii Hilaac, kaas oo door weyn ka ciyaaray xoojinta amniga iyo la dagaallanka kooxaha argagixisada. Tababarka galabta loogu furay guutada saddexaad ee Ciidanka Daraawiishta, xarunta tababarada Ciidanka ee Xorgoble ee magaalada Qardho, ayaa qeyb ka ah qorshe ballaaran oo ay Dowladdu ku horumarinayso khibradda, aqoonta iyo tayeynta Ciidamada. Sidoo kale, guutada labaad ee Ciidanka ayaa iyaduna tababar uga bilaabanaya kulliyadda tababarada Ciidanka ee Gen. Green ee degmada Badhan. Munaasabadda waxaa ka qeyb galay xubno ka tirsan Goleyaasha Dowladda Puntland, saraakiisha kala duwan ee Ciidamada, la-taliyeyaal Madaxweyne, maamulka gobolka Karkaar, maamulka degmada Qardho iyo qeybaha kala duwan ee bulshada. Tababarradan ayaa muujinaya dadaalka joogtada ah ee Dowladda Puntland ku bixinayso xoojinta awoodda difaaca iyo sugidda amniga guud ee deegaannada Puntland. DHAMMAAD

Garowe, 5 Mar 2026- Guddoomiye Ku-xigeenka 2-aad ee Golaha Wakiillada Dowladda Puntland Hon Mohamed Mahamud Esse iyo qaar ka mid ah Mudanayaasha Golaha ayaa maanta soo dhoweeyey Xildhibaannada Puntland ku metela labada Aqal ee Baarlamaanka Federaalka Soomaaliya. Munaasabadda waxaa sidoo kale ka soo qayb galay Madaxweynihii hore ee Dowladda Puntland, ahna Senator ka tirsan Aqalka Sare ee Baarlamaanka Federaalka Soomaaliya, Wasiirro, masuuliyiin kala duwan iyo qaybaha kala geddisan ee bulshada Puntland. Kulankan soo dhoweynta ah ayaa muujinayey midnimoiyo is garab istaag wakiillada shacabka Puntland ku metela labada Aqal ee Baarlamaanka Federaalka Soomaaliya. DHAMMAAD

Balidhidin, 4 Mar 2026: Xildhibaan Faarax Jaamac Yuusuf oo ka mid ah Golaha Wakiilada Dowlada Puntland ayaa ka qayb galay kulan ku saabsan dhismaha iyo sharciyeynta Guddi Xallinta Khilaafaadka Bulshada (CDRC) ee tuulada Tuurmasaale, Degmada Balidhidin. Kulanka ayaa waxaa ku weheliyey Wasiir Doowlaha Wasaaradda Arrimaha Gudaha, Federaalka iyo Dimuqraadiyeynta ee Puntland, waxaana ka soo qayb galay odayaasha dhaqanka, haweenka, dhalinyarada iyo qaybaha kala duwan ee bulshada. Ujeeddada kulanka ayaa ahayd in la xaqiijiyo baahida loo qabo guddigan, isla markaana la hubiyo in xubnaha la soo xulayo ay noqdaan kuwo leh metelaad dhab ah, karti iyo kalsooni bulsho, si ay door wax ku ool ah uga qaataan xallinta khilaafaadka iyo adkaynta nabadda deegaanka. DHAMMAAD